శ్రీనగర్: జమ్మూ కాశ్మీర్‌లోని అనంతనాగ్ ప్రాంతంలో మంగళవారం ఉదయం సైనికులకు, ఉగ్రవాదులకు మధ్య ఎదురుకాల్పులు జరిగాయి. ఈ ఘటనలో ఓ ఉగ్రవాది మరణించాడు. మృతదేహం వద్ద సైనికులు ఆయుధాలను స్వాధీనం చేసుకొని, సమీప ప్రాంతాల్లో తనిఖీలు ముమ్మరం చేశారు.

దిల్లీ: దేశ రాజధాని దిల్లీలో భారీ భద్రతా ఏర్పాట్ల నడుమ గణతంత్ర దినోత్సవ వేడుకలను నిర్వహించారు. రాష్టప్రతి ప్రణబ్ ముఖర్జీ రాజ్‌పథ్‌లో జాతీయ జెండాను ఎగురవేసి త్రివిధ దళాల నుంచి గౌరవ వందనం స్వీకరించారు. ఈ ఏడాది వేడుకలకు ఫ్రాన్స్ అధ్యక్షుడు హోలాండె ముఖ్య అతిథిగా హాజరవడంతో అనూహ్య రీతిలో భద్రతా చర్యలు తీసుకున్నారు. దివంగత లాన్స్ నాయక్ మోహన్‌దాస్ గోస్వామి భార్యకు ప్రణబ్ అశోకచక్ర పురస్కారం అందజేశారు.

జైపూర్, జనవరి 25: జాతిపిత మహాత్మాగాంధీ విగ్రహాన్ని రాజస్థాన్‌లోని దూదు జిల్లాలో కొందరు సంఘవిద్రోహ శక్తులు అపవిత్రం చేశారు. ఈ విగ్రహాలపై ముందూ వెనక ఇస్లామిక్ మిలిటెంట్ సంస్థ ‘ఐసిస్’ సందేశాలను రాశారు. ఈ విషయం సోమవారం తెల్లవారుజామున బయటపడింది. ఇవన్నీ హెచ్చరిక సందేశాలుగానే ఉన్నాయని, ఇందుకు పాల్పడ్డవారి ఆచూకీ తెలుసుకునేందుకు ప్రయత్నిస్తున్నామని జైపూర్ ఐజి డి.సి.జైన్ తెలిపారు.

న్యూఢిల్లీ, జనవరి 25: అరుణాచల్ ప్రదేశ్‌లో రాష్టప్రతి పాలన విధించడాన్ని సవాల్ చేస్తూ కాంగ్రెస్ పార్టీ సుప్రీం కోర్టులో పిటిషన్ దాఖలు చేసింది. ‘సుప్రీం కోర్టు రిజిస్ట్రీలో సోమవారం మేం పిటిషన్ దాఖలు చేశాం’ అని కాంగ్రెస్ నేత, సీనియర్ అడ్వొకేట్ వివేక్ టంఖా వెల్లడించారు. అరుణాచల్ రాష్ట్ర కాంగ్రెస్ చీఫ్ విప్ బమాంగ్ ఫెలిక్స్ పిటిషన్ వేశారన్నారు.