డొంగ్‌హేయి సిటీ (కొరియా), మే 17: ఇక్కడ జరుగుతున్న ఆసియా చాంపియన్స్ ట్రోఫీలో డిఫెండింగ్ చాంపియన్, భారత మహిళా జట్టు ప్రత్యర్థి మలేషియాను సెమీ ఫైనల్స్‌లో 3-2తో ఓడించి ఫైనల్‌కు చేరుకుంది. అంతకుముందు జరిగిన మ్యాచ్‌లలో జపాన్‌పై 4-1, చైనాపై 3-1 తేడాతో భారత్ విజయం సాధించింది. పాయింట్ల పట్టికలో తొమ్మిది పాయింట్లతో అగ్రస్థానంలో ఉన్న భారత్ ఫైనల్‌లో ఆతిధ్య జట్టు కొరియాతో శనివారంనాడు తలపడుతుంది.

న్యూఢిల్లీ, మే 17: ప్రస్తుత ఐపీఎల్ సీజన్‌లో వరుస విజయాలతో దూసుకుపోతూ మొత్తం టీమ్‌లలో రెండో స్థానంలో ఉన్న చెన్నై సూపర్ కింగ్స్ శుక్రవారం ఢిల్లీ డేర్‌డెవిల్స్‌తో జరిగే పోరులో విజయం సాధించడం ద్వారా పైమెట్టుకు ఎగబాకాలని తహతహలాడుతోంది. చెన్నై ఇంతవరకు 12 మ్యాచ్‌లు ఆడగా, వాటిలో ఎనిమిదింట్లో విజయం సాధించి, మరో నాలుగింట్లో పరాజయాన్ని చవిచూసింది.

డబ్లిన్, మే 16: పాకిస్తాన్‌లో పర్యటించేందుకు ఎలాంటి అభ్యంతరం లేదని ఐర్లాండ్ క్రికెట్ బోర్డు ప్రకటించింది. అంతర్జాతీయ క్రికెట్ సిరీస్‌లు లేకపోవడంతో నానా ఇబ్బందులు పడుతున్న పాకిస్తాన్ క్రికెట్ బోర్డు (పీసీబీ)కి ఇది కొత్త ఊపిరినిచ్చే పరిణామమే. టెస్టు హోదాను దక్కించుకున్న తర్వాత ఐర్లాండ్ తన తొలి మ్యాచ్‌ని పాకిస్తాన్‌తో ఆడింది.

రోమ్, మే 16: ఇక్కడ జరుగుతున్న ఇటాలియన్ ఓపెన్ టెన్నిస్ టోర్నమెంట్‌లో రష్యాబ్యూటీ మరియా షరపోవా రెండో రౌండ్ చేరడానికి మారథాన్ మ్యాచ్‌ని ఆడాల్సి వచ్చింది. చిరుజల్లులు కురుస్తున్న నేపథ్యంలో, ఆస్ట్రేలియాకు చెందిన ఆష్లే బార్టీని ఆమె 7-5, 3-6, 6-2 తేడాతో ఓడించి రెండో రౌండ్ చేరింది. మరింత ముందంజ వేయడానికి ఆమె రెండో రౌండ్‌లో డొమినికా సిబుల్కొవాను ఢీ కొంటుంది.