మేడికొండూరు, జూలై 31: ఎదురుగా వస్తున్న కుక్కను తప్పించబోయి ఆటో బోల్తాకొట్టగా బోల్తాపడివున్న ఆటోను లారీ ఢీకొన్న ప్రమాదంలో నలుగురు మృతిచెందిన సంఘటన గుంటూరు జిల్లా మేడికొండూరు మండలం డోకిపర్రు జోసిల్ కంపెనీ వద్ద ఆదివారం జరిగింది.

ఏలూరు, జూలై 31: డ్రైవర్ అప్రమత్తత కారణంగా రాయగడ నుంచి విజయవాడ వెళుతున్న పాసింజర్ రైలుకు ఆదివారం పశ్చిమ గోదావరి జిల్లాలో తృటిలో భారీ ప్రమాదం తప్పింది. ఏలూరు - వట్లూరు రైల్వే స్టేషన్ మధ్యలో ఇంజను పట్టాలు తప్పడంతో డ్రైవర్ అప్రమత్తమై వెంటనే రైలును నిలిపివేయడంతో భారీ ప్రమాదం తప్పింది. పట్టాలు తప్పిన సమయంలో రైలు కేవలం 30 కిలోమీటర్ల వేగంలో వెళుతుండటంతో నిలుపుదల చేసేందుకు వీలుకలిగింది.

ఒంగోలు, జూలై 31: ప్రత్యేక హోదా విషయంలో రాష్ట్రానికి జరిగిన అన్యాయాన్ని ప్రజలకు వివరిస్తామని ఉప ముఖ్యమంత్రి కెఇ కృష్ణమూర్తి తెలిపారు. ఒంగోలులో ఆదివారం ఆయన విలేఖర్లతో మాట్లాడుతూ హోదా కోసం జపాన్ తరహాలో శాంతియుతంగా ఉద్యమిస్తామన్నారు. ప్రజలకు చేరవయ్యేందుకే కారణాలను వెతుక్కునే పరిస్థితి వైఎస్‌ఆర్ కాంగ్రెస్ పార్టీకి ఏర్పడిందని కెఇ ధ్వజమెత్తారు.

హైదరాబాద్, జూలై 31: తెలంగాణ జిల్లా ఎస్పీలపై డైరెక్టర్ జనరల్ ఆఫ్ పోలీస్ అనురాగ్ శర్మ సీరియస్ అయ్యారు. ప్రజా ఫిర్యాదులపై ఎందుకు స్పందించడం లేదంటూ ఆగ్రహం వ్యక్తం చేశారు. జిల్లాల నుంచి తమకు పనులు కావడం లేదంటూ ప్రజలు తన దగ్గరకు వస్తున్నారని, ఎస్పీలు టైం ఇవ్వడం లేదంటున్నారని ఇకపై ఇలాంటి ఫిర్యాదులు సహించేది లేదని డిజిపి మందలించారు.