ఇంఫాల్‌: మణిపూర్‌ సెంట్రల్‌ జైల్లోశనివారం ఖైదీల మధ్య జరిగిన ఘర్షణలో ముగ్గురు ఖైదీలు మృతి చెందారు. ఈ ఘటనలో ముగ్గురు జైలు అధికారులతో పాటు మరో ఖైదీ గాయపడ్డట్లు పోలీసులు చెప్పారు.ఇంఫాల్‌లో గల సెంట్రల్‌ జైల్లో యూసుఫ్‌(21), అబ్దస్‌(22) అనే ఇద్దరు ఖైదీలు అదే జైల్లో ఖైదీగా ఉంటున్న చురాచంద్‌పూర్‌ జిల్లాకు చెందిన తంగిమిన్‌లీన్‌ అనే వ్యక్తిని దారుణంగా కొట్టి చంపారు.

హైదరాబాద్‌: ఒడిశా నుంచి దక్షిణ తమిళనాడు వరకు కోస్తాంధ్ర తీరం వెంబడి అల్పపీడన ద్రోణి కొనసాగుతోందని హైదరాబాద్‌లోని వాతావరణ కేంద్ర అధికారులు వెల్లడించారు. ఉత్తర కర్ణాటక పరిసర ప్రాంతాల్లో ఉపరిత ఆవర్తనం నెలకొని ఉందని తెలిపారు. రంగారెడ్డి, హైదరాబాద్‌, మహబూబ్‌నగర్‌, మెదక్‌ జిల్లాల్లో పలు చోట్ల భారీ వర్షాలు, అనంతపురం, కడప జిల్లాల్లోని ఒకటి రెండు చోట్ల భారీ వర్షాలు కురిసే అవకాశం ఉందన్నారు.

కర్నూలు : నంద్యాల ఎంపీ ఎస్పీవై రెడ్డి కుమార్తె సుజలతో పాటు మరో ఇద్దరిపై హత్యకేసు నమోదయ్యింది. నంది అకాడమీలో పీఆర్వోగా పనిచేసిన సుమంత్ హత్య కేసులో ఎంపీ కూతురిని అరెస్ట్ చేయాలని పలు ప్రజాసంఘాలు డిమాండ్ చేశారు. సుజల సూచన మేరకు మురళి, షఫీ అలీ అనే ఇద్దరు సుమంత్‌ను దారుణంగా కొట్టి చంపినట్లు మృతుడి బంధువులు ఫిర్యాదు చేశారు. దీంతో వారిపై హత్యకేసు నమోదు చేసినట్లు పోలీసులు చెప్పారు.

విజయవాడ: ఎన్‌డిఎ ప్రభుత్వంలో తమ పార్టీకి ఉన్న రెండు మంత్రి పదవులు పోయినా కొంప మునిగేదీమీ లేదని, ప్రత్యేక హోదా కోసం తాము ఎంతటి పోరాటాలకైనా సిద్ధమేనని టిడిపి ఎంపి కేశినేని నాని శనివారం మీడియాతో అన్నారు. రాష్ట్ర ప్రయోజనాల కోసం టిడిపి ఎంపీలు రాజీనామాలు చేసేందుకైనా రెడీగా ఉన్నారని అన్నారు.