తిరుపతి, డిసెంబర్ 3: కార్తీక పౌర్ణమి పర్వదినాన్ని పురస్కరించుకుని శ్రీవారి ఆలయంలో ఆదివారం కార్తీక దీప మహోత్సవం కన్నుల పండువగా జరిగింది. కార్తీక పున్నమినాడు సా. 5 గంటల నుంచి రాత్రి 8 గంటల వరకు దీపోత్సవాన్ని భక్తిశ్రద్ధలతో నిర్వహించారు. ఈ సందర్భంగా ముందుగా ఆలయంలో ఉపాలయమైన యోగ నరసింహస్వామి ఆలయం పక్కనున్న పరిమళ అరవద్ద 100 కొత్త మూకుళ్లలో నేతి దీపాలు వెలిగించారు.

డీ.హీరేహాల్, డిసెంబర్ 3 : అనంతపురం జిల్లాలోని కర్నాటక సరిహద్దు మండలాల్లో గత పదిరోజుల నుంచి కర్నాటక నుంచి వచ్చిన రెండు మగ ఏనుగులు బీభత్సం సృష్టిస్తున్న విషయం తెలిసిందే. ఏనుగుల దాడిలో ఇప్పటికే జిల్లాలో ఒకరు మృతిచెందగా ఆదివారం డీ.హీరేహాల్ మండలం మురిడి గ్రామంలో రైతు గొల్ల ఏకాంతప్ప(45) మృతిచెందాడు. వివరాలు.. కణేకల్లు, డీ.హీరేహాల్ మండలాల్లో గత రెండు రోజుల నుంచి ఏనుగులు బీభత్సం సృష్టిస్తున్నాయి.

విజయవాడ, డిసెంబర్ 3: ముఖ్యమంత్రి నారా చంద్రబాబు నాయుడు సోమవారం నుంచి దక్షిణ కొరియాలో విస్తృతంగా పర్యటించబోతున్నారు. భారత కాలమానం ప్రకారం సోమవారం తెల్లవారుజామున 2.20 గంటలకు ఆయన సియోల్ విమానాశ్రయానికి చేరుకోనున్నారు. తొలుత భారత రాయబారి విక్రమ్ దొరైస్వామితో భేటీ అవుతారు. 6.15 గంటలకు కియా అనుబంధ సంస్థల ప్రతినిధులతో సమావేశమవుతారు. 6.50 గంటలకు దాసన్ నెట్‌వర్క్ చైర్మన్ నామ్ మెయిన్ వూతో సమావేశమవుతారు.

మడకశిర, డిసెంబర్ 3 : పోలవరం ప్రాజెక్టు నిర్మాణంపై కార్యాచరణ రూపొందించేందుకు సోమవారం ఢిల్లీలో కాంగ్రెస్ పార్టీ రాజ్యసభ సభ్యులు కేవీపీ రామచంద్రరావు అధ్యక్షతన ప్రత్యేక సమావేశం నిర్వహించనున్నట్లు ప్రదేశ్ కాంగ్రెస్ పార్టీ అధ్యక్షుడు ఎన్.రఘువీరారెడ్డి తెలిపారు. రఘువీరా ఆదివారం అనంతపురం జిల్లా నీలకంఠాపురంలో విలేఖరులతో మాట్లాడారు.