ప్రభుత్వ టీచర్లందరికీ ‘ఏకీకృత సర్వీస్ రూల్సు’ అమలు చేసేందుకు అడ్డంకులన్నీ తొలగిపోయాయని ఉభయ తెలుగు రాష్ట్రాల విద్యాశాఖా మంత్రులు ఇదివరకే ప్రకటించారు. టీచర్లందరినీ ఒకే గొడుగు కిందకు తెస్తామన్న వారి వాగ్దానం ఇపుడు అటకెక్కిపోయింది. ప్రస్తుతానికి పంచాయతీ రాజ్ టీచర్లకు మాత్రమే ఏకీకృత సర్వీస్ రూల్సు వర్తిస్తాయని స్పష్టమైంది. ‘ఏకీకృతం’ అంటే వేర్వేరుగా ఉన్న వాటిని కలపడమే కదా.

అవినీతి ఏ రూపంలో జరిగినా సహించేది లేదని తెలుగు రాష్ట్రాల సిఎంలు కెసిఆర్, చంద్రబాబు స్పష్టం చేశారు. అవినీతి మచ్చుకు కూడా కనిపించకూడదని వారు ఆదేశించారు. అధికారులు అవినీతికి పాల్పడితే ప్రభుత్వానికే చెడ్డ పేరు వస్తుంది. ఆస్తిపాస్తుల రిజిస్ట్రేషన్‌లు డబ్బులిస్తే చేస్తారని, లేకుంటే చేయరనే అభిప్రాయం ప్రజల్లో బలంగా ఉంది. రిజిస్ట్రేషన్ల శాఖలో సంస్కరణలు జరగాలి.

అభివృద్ధి, పరిశ్రమలు, రోడ్ల విస్తరణ పేరిట ప్రభుత్వాలు అవసరాన్ని మించి భూములు సేకరిస్తున్నాయి. నిర్వాసితులకు పెద్దమొత్తంలో నష్టపరిహారం అందిస్తున్నామని ప్రభుత్వాలు భావించవచ్చు. కాని పరిహారం పరిహాసంగా మారుతున్నది. నష్టపరిహారం పొందిన వారెందరో తెలియనిచోట, తెలియని వ్యాపారాలు చేసి నష్టపోవటం, తెలిసిన వారి చేతిలో మోసపోవటమో చూస్తున్నాం.

బ్యాంకుల నుంచి భారీగా రుణాలు తీసుకుని ‘ఎగవేతదారులు’గా మారిన బడాబాబుల వివరాలను వెల్లడించరాదని రిజర్వు బ్యాంకు ఏమైనా ఆదేశాలిచ్చిందా? ప్రభుత్వ,ప్రైవేటు బ్యాంకులు ఈ విషయమై ఎందుకు వౌనం వహిస్తున్నాయి? రుణాలు వసూలు కాకపోతే బ్యాంకులు, ఎగవేతదారులు కుమ్మక్కయ్యారన్న అనుమానాలు కలగడం సహజం. అక్రమాలకు పాల్పడినవారు ప్రముఖ రాజకీయ నేతలైనప్పటికీ వారి బాగోతం ప్రజలకు తెలియాలి.