అంపశయ్యపై ఉన్న చేనేతను జిఎస్టీ పరిధిలోకి చేర్చడం అత్యంత దురదృష్టకరం. చిలపనూలు, చేనేత వస్త్రాలపై 23 శాతం పన్ను విధించడంతో ఈ పరిశ్రమకు మరణ మృదంగం మోగించడమే అవుతుంది. ఇప్పటికే ఈ పరిశ్రమ వీడి వేలాదిమంది చేనేత కార్మికులు ఇల్లు వదిలి, పల్లె దాటి సుదూర ప్రాంతాలకు వలసపోతున్న సంగతి తెలిసిందే. మరి కొంతమంది ప్రత్యామ్నాయ వృత్తులోకి వెడుతున్నారు.

సరైన ధర లభించక రెండు నెలల క్రితం ‘రైతు గొంతులో పచ్చి టమాటా’గా మిగిలిన ఈ ప్రసిద్ధ కూరగాయ- నేడు ధర అమాంతం పెరిగి వినియోగదారులకు బరువుగా మారింది. పంట ఎక్కువై కిలో టమాటా ధర రూపాయి పలికి, గతిలేని పరిస్థితిలో రైతులు వాటిని బస్తాలకొద్దీ రోడ్డుమీదే పారవేసిన సంగతి ఇంకా మనం మరచిపోలేదు. ఈ పరిస్థితుల్లోనే దిగుబడి లేక టమాటా ధర కిలోకు వంద రూపాయలు పలకడం ఆశ్చర్యకరం.

దేశమంటే మట్టి కాదోయ్.. దేశమంటే మనుషులోయ్
మనుషులంటే వనరులోయ్.. ‘పవరు’ నిండిన టవరులోయ్
మంది పెరిగితే మజ్జిగన్నది పలుచబడునని పాత మాటోయ్
మానవాళి ఏకమయ్యిన అద్భుతాలే చేయగలరోయ్
పుడమితల్లికి నిత్య పురుడై జనాభాయే పెరుగుచుండోయ్
ప్రకృతి కోపం, తీవ్రవాదం విధికి తోడై-
జనం కొందరు రాలుతుండోయ్
చైనా, భారత్ జనాభాలో ఒకటి రెండూ ర్యాంకులండోయ్

సమాజంలో అగ్రవర్ణాలుగా పిలవబడుతున్న ఒక సామాజిక వర్గాన్ని అవహేళన చేసేలా ఇటీవల సినిమాలు నిర్మిస్తున్నారు. ఇతర సామాజిక వర్గాల గురించి, వారి ఆచార వ్యవహారాల జోలికి సినిమా వాళ్లు వెళ్లరు. కారణం వారు తిరగబడతారు అనే కదా! కేవలం వ్యాపార దృష్టితో చూస్తూ అవగాహన రాహిత్యం వలన ఇటువంటి పోకడలు ఏర్పడుతున్నాయి. కొన్ని సామాజిక వర్గాల్లో కట్టుబాట్లు, ఆచారాలు, మత విశ్వాసాలు ఏనాటి నుంచో ఉన్నాయి.