దిల్లీ: రైతులు, సామాన్య జనం రుణాలు బకాయిపడితే వారి ఆస్తులను జప్తు చేసే బ్యాంకులు వేలకోట్ల రూపాయల్లో బకాయిపడే వారిపై ఎలాంటి చర్యలూ తీసుకోవడం లేదని సుప్రీం కోర్టు ఘాటుగా వ్యాఖ్యానించింది. రుణఎగవేతదారుల వివరాలు వెల్లడించలేమంటూ ఆర్‌బిఐ నిస్సహాయతను వ్యక్తం చేయడం సరైన విధానం కాదని కోర్టు అసంతృప్తి వ్యక్తం చేసింది.

ముంబయి: కాంగ్రెస్ ఉపాధ్యక్షుడు రాహుల్ గాంధీ మంగళవారం నాడు ముంబయిలోని అతిపెద్ద డంపింగ్ యార్డు (డియోనార్)ను సందర్శించి అక్కడి పరిస్థితులపై స్వయంగా ఆరా తీశారు. నిత్యం స్వచ్ఛ్భారత్ అంటూ గొప్పలు చెప్పే ప్రధాని మోదీ ముంబయిలోని చెత్త సమస్య గురించి పట్టించుకోరా? అంటూ రాహుల్ ఆగ్రహం వ్యక్తం చేశారు. వాయు కాలుష్యం వల్ల ప్రజలు మరణిస్తున్నా కేంద్ర ప్రభుత్వం ఉదాసీనంగా వ్యవహరిస్తోందన్నారు.

కొల్లం: కేరళలోని కొల్లం జిల్లా పుట్టింగళ్ ఆలయం వద్ద బాణసంచా పేలుడు ఘటనలో నిందితులైన ఏడుగురు ఆలయ కమిటీ సభ్యులు మంగళవారం పోలీసుల ఎదుట లొంగిపోయారు. బాణసంచా వల్ల మంటలు వ్యాపించి వందమందికిపైగా మరణించడంతో ఆలయ కమిటీ సభ్యులపైన, బాణసంచా కాంట్రాక్టర్లపైన వివిధ సెక్షన్ల కింద పోలీసులు కేసులు నమోదు చేశారు. ఈ ఘటనలో సోమవారం అయిదుగురిని పోలీసులు అరెస్టు చేశారు.

దిల్లీ: మే నెల రాకముందే దేశవ్యాప్తంగా అనేక రాష్ట్రాల్లో వేసవి ఎండలు ప్రజలను హడలెత్తిస్తున్నాయి. పగటి ఉష్ణోగ్రతలు అధికం కావడంతో జనం ఇళ్ల నుంచి బయటకు వెళ్లేందుకు భయపడుతున్నారు. ఎపి, తెలంగాణ, ఒడిశా, యుపి, దిల్లీ, జార్ఖండ్ తదితర రాష్ట్రాల్లో వడగాలుల జోరు పెరిగింది. ఒడిశాలో ఒక్కరోజులోనే 19 మంది ఎండదెబ్బకు మరణించడంతో ఆ రాష్ట్రంలో స్కూళ్లకు ఈనెల 20 వరకూ సెలవులు ప్రకటించారు.