న్యూఢిల్లీ : మొబైల్ వాడకంలో భారత్ రెండవ స్థానం సంపాదించింది. దాదాపు 100 కోట్ల మంది భారతీయులు మొబైల్ ఫోన్లు వినియోగిస్తున్నట్లు భారత టెలికాం రెగ్యులేటర్ ట్రాయ్ ధృవీకరించింది. ఒక్క అక్టోబర్‌లోనే 10 మిలియన్ల మంది మొబైల్ వినియోగదారులు పెరిగినట్లు పేర్కొంది.

న్యూఢిల్లీ : 2016 నూతన సంవత్సరం సందర్భంగా దేశ ప్రజలకు రాష్టప్రతి ప్రణబ్ ముఖర్జీ నూతన సంవత్సర శుభాకాంక్షలు తెలిపారు. నూతన సంవత్సరంలో ప్రజలకు, పర్యావరణానికి అనుబంధం ఏర్పడి దేశం సస్యశ్యామలంకావాలని ఆయన ఫేస్‌బుక్ ద్వారా ఆకాంక్షించారు. కొత్త సంవత్సరంలో ప్రజల జీవితాలు సుఖసంతోషాలతో నిండాలని పేర్కొన్నారు.

లక్నో : అభివృద్ధితో అనుసంధానం అవ్వాలంటే గ్రామాలకు రహదారులు అవసరమని ప్రధాని నరేంద్ర మోదీ తెలిపారు. ఆయన గురువారంనాడు ఢిల్లీ-మీరట్ ఎక్స్‌ప్రెస్ హైవేకి శంకుస్థాపన చేశారు. ఈ సందర్భంగా ఆయన మాట్లాడుతూ కాలుష్యరహితంగా దీని నిర్మాణం జరుగుతుందని చెప్పారు. ఈ కార్యక్రమంలో కేంద్రమంత్రులు నితిన్ గడ్కరీ, మహేష్‌శర్మ హాజరుకాగా, ఉత్తరప్రదేశ్ ముఖ్యమంత్రి అఖిలేష్ యాదవ్ గైర్హాజరయ్యారు.

హైదరాబాద్: రాష్టప్రతి ప్రణబ్ ముఖర్జీ నగరంలో 14 రోజుల శీతాకాల విడిది అనంతరం గురువారం ఉదయం దిల్లీకి పయనమయ్యారు. హకీంపేట ఎయిర్‌పోర్ట్ నుంచి ప్రత్యేక విమానంలో ఆయన బయల్దేరారు. కాగా, జనవరి 3 నుంచి వారం రోజులపాటు బొల్లారంలోని రాష్టప్రతి నిలయాన్ని సందర్శించేందుకు ప్రజలకు అనుమతిస్తారు.