మనదేశంలోకి అక్రమంగా చొరబడి ఏళ్ల తరబడి నివసిస్తున్న ‘రోహింగియా’ తెగకు చెందిన వారిని దేశం నుంచి బయటికి తరలించరాదని ‘ఐక్యరాజ్య సమితి’ హక్కుల సంస్థ కోరడం విచిత్రమైన వ్యవహారం. మనదేశపు అంతర్గత వ్యవహారాలలో అక్రమ ప్రమేయానికి ఇది మరో నిదర్శనం! శరణార్థులకు సంబంధించిన ఐక్యరాజ్య సమితి నియమావళిని అనేక దేశాల ప్రభుత్వాలు ఉల్లంఘిస్తున్నాయి. అలాంటి ప్రభుత్వాలను ఐక్యరాజ్య సమితి వారు నిరసించాలి!

ప్రజాప్రతినిధుల, రాజకీయ వేత్తల ఆస్తుల విలువ శరవేగంతో పెరుగుతుండడం పట్ల సర్వోన్నత న్యాయస్థానం విస్మయాన్ని వ్యక్తం చేయడం రాజకీయాలను ఆవహించి ఉన్న అవినీతికి మరో నిదర్శనం. ఈ విషయమై సకాలంలో దర్యాప్తు జరుపనందుకు ప్రభుత్వాన్ని సర్వోన్నత న్యాయస్థానం బుధవారం తప్పుపట్టడం సంచలనాత్మక పరిణామం.

నకిలీ గోరక్షకుల వల్ల గోసంతతికి జరిగిన, జరుగుతున్న నష్టానికి ఇదంతా నిదర్శనం! నకిలీ గోరక్షకులను కఠినంగా అణచివేయాలని సర్వోన్నత న్యాయస్థానం బుధవారం మరోసారి కేంద్ర, రాష్ట్ర ప్రభుత్వాలను ఆదేశించడానికి కారణం ఈ నకిలీలు జరిపిన అత్యాచారాలు! సర్వోన్నత న్యాయస్థానం ధ్రువీకరించింది కనుక దేశమంతటా ఇలాంటి నకిలీ గోరక్షకులు గోమాంసం తినదలచిన వారిపై అత్యాచారాలు జరుపుతున్నారని విశ్వసించవలసి వస్తోంది!

‘బ్రిక్స్’ దేశాల ప్రభుత్వాధినేతల సమావేశంలో ఆమోదించిన ‘ఉగ్రవాద వ్యతిరేక’ విధాన పత్రం మన దేశం చైనా, పాకిస్తాన్‌లపై సాధించగలిగిన వ్యూహాత్మక విజయం. పాకిస్తాన్ ప్రభుత్వ ప్రేరిత బీభత్సకాండను తుదముట్టించడంలో ఇది తుది విజయం కాదన్నది మాత్రం నిరాకరింపజాలని నిజం.