హైదరాబాద్‌లో జూన్ రెండవ తేదీ నుంచి పదవ తేదీ వరకు ప్రపంచ తెలుగు మహాసభలు జరపాలన్న తెలంగాణ రాష్ట్ర ప్రభుత్వ నిర్ణయం మాతృభాషాభిమానులకు ఆపాత మధురం! జంటనగరాలలోని వందలాది పాఠశాలలలో చదువుతున్న తెలుగు విద్యార్థులలో అత్యధికులకు తెలుగు అక్షరాలు రాని విచిత్ర స్థితి ఏర్పడి ఉండడం తెలుగు కోసం పరితపిస్తున్న వారికి కలవరం కలిగిస్తున్న కఠోర వాస్తవం! ఈ స్థితిలో తెలంగాణ ప్రభుత్వ నిర్ణయం ఊరట కలిగిస్తున్న పరిణామం.

‘వాల్‌మార్ట్’ సంస్థ తెలంగాణలో పది కొత్త దుకాణాలను ప్రారంభించనున్నదట. అందువల్ల అమెరికాకు చెందిన ఈ సంస్థను కేంద్ర ప్రభుత్వం వెళ్లగొట్టలేదన్నది ఇప్పటికి స్పష్టంగా నిర్ధారణ అయింది. ప్రపంచంలోని దాదాపు అన్ని దేశాల్లోను ఘరానా ‘చిల్లర’ దుకాణాలను నడిపిస్తున్న ‘వాల్‌మార్ట్’ అతి పెద్ద అంతర్జాతీయ ‘కిరాణా దుకాణాల సమాఖ్య’గా పేరు మోసింది. అతి పెద్ద అవినీతి సామ్రాజ్యంగా ఈ సంస్థ అవతరించడం సమాంతర విపరిణామం.

‘కూర్చొని తింటూ ఉంటే కొండలైనా కరిగిపోతాయన్న’ది జీవన వ్యవహారం. హిమాలయ పర్వతశ్రేణి కరగిపోతుండడం వేడిమి వ్యవహారం! కాలుష్యాన్ని భోంచేస్తున్న ప్రకృతి దాన్ని జీర్ణించుకోలేక వేడిమిని వెళ్లగక్కుతోంది. ఈ వేడిమి హిమాలయ పర్వతశ్రేణిని కరగించి వేస్తూండడం దశాబ్దులుగా వేధిస్తున్న సమస్య. ‘హిమాలయ నగాధిరాజు’నే కరగించి వేస్తున్న వేడిమి జన జీవనాన్ని కదిలించి వేయడంలో, కల్లోల పరచడంలో ఆశ్చర్యం లేదు.

వ్యవసాయం వల్ల లభించే ఆదాయంపై పన్ను వసూలు చేయాలని ‘నీతి ఆయోగ్’ కోరుతుండడం జాతీయ ఆర్థిక నీతికి దాపురించిన ‘ప్రపంచీకరణ’ ప్రభావ ఫలితం! వ్యవసాయ రంగం ‘ప్రపంచీకరణ’కు బలి కాకుండా నిరోధించాలన్న స్వదేశీయ ఉద్యమం ఒక వైపున నడుస్తోంది. మరో వైపున మన వ్యవసాయ రంగాన్ని విచ్ఛిన్నం చేయాలన్న ‘ప్రపంచీకరణ’ శక్తుల కుతంత్రం కొనసాగుతూనే ఉంది.