హైదరాబాద్, నవంబర్ 19: పెద్ద నోట్ల రద్దు రవాణా రంగానికి షాక్ ఇచ్చింది. హైదరాబాద్ పరిసరాలతో సహా రెండు తెలుగురాష్ట్రాల్లో జాతీయ రహదారులపై ఎక్కడ బడితే అక్కడ భారీ సంఖ్యలో లారీలు, ట్రక్కులు నిలిచిపోయాయి. సరిపడా చెల్లుబాటయ్యే నోట్లు లేకపోవడం, చిల్లర నోట్లకొరత వల్ల రవాణా రంగం స్తంభించింది.

విజయవాడ, నవంబర్ 19: ప్రముఖ విద్యావేత్త, బహుగ్రంథ రచయిత కొమరగిరి యోగానంద లక్ష్మినరసింహారావు (93) శనివారం హైదరాబాద్‌లో కన్నుమూశారు. ఆయన మృతిపట్ల ఆంధ్రప్రదేశ్ ముఖ్యమంత్రి చంద్రబాబు నాయుడు ఒక ప్రకటనలో సంతాపం ప్రకటించారు. పలు విద్యాసంస్థల్లో ప్రిన్సిపాల్‌గా పని చేసిన నరసింహారావు ఎందరో విద్యార్థులను తీర్చిదిద్దారంటూ శ్లాఘించారు.

షాద్‌నగర్, నవంబర్ 19: సాంకేతిక లోపం కారణంగా బెంగళూర్ ఎక్స్‌ప్రెస్ రైలు నిలిచిపోవడంతో ప్రయాణికులు తీవ్ర ఇబ్బందులు ఎదుర్కొన్నారు. శనివారం రాత్రి ఎనిమిది గంటలకు షాద్‌నగర్ రైల్వే స్టేషన్ సమీపంలోని చటాన్‌పల్లి రైల్వే గేటు వద్ద సాంకేతిక లోపం కారణంగా నిలిచిపోయింది. కాచిగూడ నుండి బెంగళూర్ వెళ్తున్న ఎక్స్‌ప్రెస్ రైలు నిలిచిపోవడంతో అటు ప్రయాణికులు ఇటు వాహన దారులు అనేక అవస్థలకు గురయ్యారు.

ఖమ్మం, నవంబర్ 19: ప్రజల ఇబ్బందులను తమకు అనుకూలంగా మార్చుకునేందుకు కమీషన్ పద్ధతిలో పాత నోట్లకు కొత్త నోట్లు ఇచ్చేలా కొత్త తరహా వ్యాపారం జోరుగా సాగుతోంది. తమవద్ద కొత్తనోట్లు ఉన్నాయని, పాతనోట్ల స్థానంలో కమీషన్ పద్ధతిలో చెల్లుబాటు అయ్యే నోట్లు ఇస్తామంటూ, భారీ మొత్తంలో అయితే ఇవ్వాల్సిన మొత్తానికి సరిపోను భూములను రిజిస్ట్రేషన్ చేయిస్తామంటూ దళారులు చెప్పుకొస్తున్నారు.