హైదరాబాద్, మే 16: రాష్ట్ర ప్రభుత్వ ఉద్యోగులకు కొత్త వేతన సవరణ కమిషన్‌ను రెండు, మూడు రోజుల్లో ప్రకటించనున్నట్టు సీఎం కల్వకుంట్ల చంద్రశేఖర్‌రావు వెల్లడించారు. గతంలో మాదిరిగా వేతన సవరణ కమిషన్‌కు ఏక సభ్యునితో కాకుండా ఈసారి త్రిసభ్య కమిషన్ ఏర్పాటు చేస్తున్నట్టు ప్రకటించారు. ఆగస్టు 15నాటికి ప్రభుత్వానికి నివేదిక సమర్పించేలా ఆదేశిస్తామన్నారు.

ఇల్లంతకుంట, మే 16: ‘రైతుబంధు’ పథకంతో యావత్ దేశం చూపు తెలంగాణ వైపుందని రాష్ట్ర మున్సిపల్, ఐటీ మంత్రి కే. తారకరామారావు అన్నారు. బుధవారం సిరిసిల్ల రాజన్న జిల్లా ఇల్లంతకుంట మండల కేంద్రంలో రైతుబంధు చెక్కుల పంపిణీ కార్యక్రమంలో పాల్గొన్నారు. ప్రపంచంలో ఎక్కడా లేనివిధంగా వ్యవసాయం పెట్టుబడికి డబ్బులు అందించి రైతులకు ఆత్మబంధువుగా సీఎం కేసీఆర్ నిలిచారన్నారు.

విజయవాడ, మే 16: ఉపాధి లక్ష్యంగా వివిధ నియోజకవర్గాల్లో ఎంఎస్‌ఎంఈ పార్కులు ఏర్పాటుకు వీలుగా ఎం-పార్క్ పాలసీ 2018-23ను రాష్ట్ర మంత్రిమండలి ఆమోదించింది. ఎలక్ట్రిక్ వాహనాల తయారీని ప్రోత్సహించేందుకు ఏపీ ఎలక్ట్రిక్ మొబిలిటి పాలసీకి కూడా ఆమోద ముద్ర వేసింది. మున్సిపాలిటీలలో 12,600 కోట్ల రూపాయలతో వివిధ అభివృద్ధి పనులు చేపట్టేందుకు పాలనామోదాన్ని తెలిపింది.

న్యూఢిల్లీ, మే 16: రాష్ట్ర విభజన చట్టంలో ఇచ్చిన హామీ మేరకు ఆంధ్రప్రదేశ్‌లో కేంద్రీయ విశ్వవిద్యాలయాన్ని ఏర్పాటు చేయాలని ప్రధాని నరేంద్ర మోదీ అధ్యక్షతన బుధవారం జరిగిన కేంద్ర కేబినెట్ భేటీలో నిర్ణయించారు. 902.07 కోట్ల వ్యయంతో ఏర్పాటు చేయనున్న కేంద్రీయ వర్శిటీ, ఈ ఏడాదినుంచే తాత్కాలిక వసతుల్లో పనిచేయటం ప్రారంభిస్తుందని కేంద్ర న్యాయ మంత్రి రవిశంకర్ ప్రసాద్ మీడియాకు వెల్లడించారు.