హైదరాబాద్, అక్టోబర్ 19: గత 15 రోజులుగా జరుగుతున్న ఆర్టీసీ ఉద్యోగుల సమ్మెను నివారించడానికి ఎలాంటి చర్యలూ చేపట్టకపోగా, దానిని శాంతిభద్రతల సమస్యగా చూస్తూ నేడు యావత్ తెలంగాణ సమాజం శాంతియుతంగా తెలంగాణ బంద్ పాటిస్తుంటే అక్రమ అరెస్టుల ద్వారా తీవ్ర నిర్బంధాన్ని ప్రయోగించడాన్ని టీటీఎఫ్ తీవ్రంగా ఖండిస్తున్నట్టు ఫెడరేషన్ అధ్యక్షుడు ఇ రఘునందన్, ప్రధానకార్యదర్శి కే రమణ పేర్కొన్నారు.

హైదరాబాద్, అక్టోబర్ 19: తెలంగాణ రాష్ట్ర గిరిజన సంక్షేమ శాఖ ఆధ్వర్యంలో చేపడుతున్న వివిధ అభివృద్ధి పనులను సకాలంలో పూర్తి చేయాలని రాష్ట్ర గిరిజన సంక్షేమ శాఖ కార్యదర్శి బెన్‌హర్ మహేష్ దత్ ఎక్కా అధికారులను ఆదేశించారు. శనివారం ఆ శాఖ ఇంజనీరింగ్ విభాగం ప్రధాన ఇంజనీరు, పర్యవేక్షక, కార్యనిర్వాహక ఇంనీర్లతో సమీక్షా సమావేశం నిర్వహించారు.

హైదరాబాద్: ఆర్టీసీ జేఏసీ నేతలతో శనివారం జరగాల్సిన ప్రభుత్వం చర్చలు జరగలేదు. కార్మిక నేతలు చర్చలకు వస్తారని తాను కార్యాలయంలో ఉదయం నుంచి ఎదురు చూస్తున్నానని ఆర్టీసీ ఇన్‌చార్జి ఎండీ సునీల్‌శర్మ స్పష్టం చేశారు. చర్చలు జరపాలని కోర్టు నుంచి ఇప్పటివరకూ తమకు ఎలాంటి సమాచారం అందలేదన్నారు. శనివారం ఉదయం 10.30 గంటలకు ఇరుపక్షాల మధ్య చర్చలు ఉంటాయని హైకోర్టు సూచించినట్లు మీడియా కథనాల్లో చూశానన్నారు.

హైదరాబాద్: ప్రభుత్వ వైఖరిని నిరసిస్తూ ఆర్టీసీ జేఏసీ నేతృత్వంలో చేపట్టిన రాష్ట్ర బంద్ విజయవంతమైందని జేఏసీ కన్వీనర్ అశ్వత్థామరెడ్డి తెలిపారు. శనివారం సాయంత్రం బంద్ ముగించుకున్న తర్వాత జేఏసీ నేతలు అశ్వత్థామరెడ్డి, రాజిరెడ్డి, థామస్‌రెడ్డి మీడియాతో మాట్లాడుతూ అన్ని వర్గాల మద్దతుతో బంద్ సక్సెస్ కావడంతో వారు కృతజ్ఞతలు తెలిపారు. సకల జనులు బంద్‌లో పాల్గొనడం పట్ల వారు స్వాగతించారు.