వరంగల్‌ : ధర్మసాగర్‌ చెరువులో శనివారం ఉదయం ఈతకు వెళ్లిన నలుగురు ఇంజనీరింగ్ విద్యార్థులు గల్లంతయ్యారు. గల్లంతైనవారిలో ముగ్గురు విద్యార్థినులున్నారు. గల్లంతైన వారు శ్రీనిధి, శివసాయి, శ్రావ్యారెడ్డి, శివసాయికృష్ణగా గుర్తించారు. వీరంతా వాగ్దేవి ఇంజనీరింగ్ కాలేజీ విద్యార్థులుగా గుర్తించారు. సమాచారం అందిన వెంటనే అధికారులు గాలింపు చర్యలు చేపట్టారు.

మెదక్‌ : ప్రమాదవశాత్తూ గుంతలో పడి ఇద్దరు చిన్నారులు మృతి చెందిన సంఘటన జహీరాబాద్‌ మండలం అల్లీపూర్‌ నేతాజీనగర్‌లో చోటు చేసుకుంది. మూడు రోజుల క్రితం ఇస్మాయిల్‌ కుమారుడు అన్సార్‌ (6), ఇర్ఫాన్‌ కుమారుడు ఇషాన్‌ (5) అదృశ్యమయ్యారు. ఎంత గాలించినా వారి ఆచూకీ తెలియలేదు. భారీ వర్షాలకు చిన్నారుల మృతదేహాలు ఓ ఇంటి నిర్మాణం కోసం తవ్విన పిల్లర్‌ గుంతలో శనివారం ఉదయం పైకి తేలాయి.

హైదరాబాద్ : హైదరాబాద్ కేంద్రీయ విశ్వవిద్యాలయంలో ఫైన్ ఆర్ట్స్ విద్యార్ధి నల్లి ప్రవీణ్ హాస్టల్ లో ఉరి వేసుకుని శుక్రవారం రాత్రి ఆత్మహత్యకు పాల్పడ్డాడు. గమనించిన తోటి విద్యార్థులు ప్రవీణ్ ను సమీపంలో ఉన్న ప్రైవేటు ఆస్పత్రికి తరలించారు. అప్పటికే ప్రవీణ్ మృతి చెందినట్లు వైద్యులు వెల్లడించడంతో మృతదేహాన్ని ఉస్మానియా ఆస్పత్రికి తరలించారు. షాద్‌న‌గ‌ర్‌లో ఉన్న కుటుంబ సభ్యులకు సమాచారం అందించారు.

హైదరాబాద్, సెప్టెంబర్ 16: వరుణుడి ప్రతాపానికి మహానగరం విలవిలలాడింది... వాన తాకిడికి వణికింది... ఒక్కముక్కలో చెప్పాలంటే నిలువునా మునిగింది... రహదారులన్నీ చెరువులను తలపించాయ. రాజధాని నగరాన్ని రెండు గంటలపాటు వరుణుడు తన గుప్పిట్లో బంధించాడనడంలో అతిశయోక్తి లేదేమో. ఆ స్థాయలో వర్షబీభత్సం నగర వాసుల్ని గడగడ లాడించింది. జనజీవనం ఒక్కసారిగా స్తంభించింది.