మహదేవపూర్, ఆగస్టు 2: మండలంలోని పవిత్ర పుణ్య క్షేత్రమైన శ్రీ కాళేశ్వర ముక్తీశ్వర త్రివేణి సంగమ తీరంలో జరుగుతున్న గోదావరి అంత్య పుష్కరాలు మంగళవారం 3వ రోజుకు చేరుకున్నాయి. అమవాస్య సందర్భంగా భక్తుల తాకిడి తగ్గింది. వివిధ ప్రాంతాల నుంచి భక్తులు హాజరై గోదావరి పుణ్య స్నానాలు చేశారు. మహిళలు గోదావరి తల్లి వాయినాలు ఇచ్చిపుచ్చుకున్నారు. పూజలు చేశారు. పితృ దేవతలకు పిండ ప్రదానం చేశారు.

కోనరావుపేట, ఆగస్టు 2: మండలంలోని వెంకట్రావుపేటలో అప్పుల బాధతో నాలుక నాగరాజు (30) అనే రైతు ఆత్మహత్య చేసుకున్నారు. మంగళవారం తెల్లవారు సమయంలో గ్రామ శివారులోని గుట్ట వద్ద చెట్టుకు ఉరి వేసుకుని ఆత్మహత్య చేసుకున్నాడు. గత ఎడాది ఆరు ఎకరాలలో పంటలు వేయగా అవికి చేతికి అందక నష్టాల పాలైనట్టు తెలిసింది. అప్పుల బాధలు తీర్చడం మూడు ఎకరాలు భూమిని విక్రయించాడు.

వెల్గటూరు, ఆగస్టు 2: మండల కేంద్రంలోని కోటిలింగాలకు వెళ్లే రహదారిలోని వాలుగు ఒర్రె పై నున్న లోలెవల్ వంతెన మంగళవారం ఎల్లంపల్లి గోదావరి బ్యాక్ వాటర్‌లో మునిగిపోవడంతో ముంపు గ్రామమైన కోటిలింగాలకు రాకపోకలు నిలిచిపోయాయి. ఎల్లంపల్లి ప్రాజెక్టు ద్వారా బ్యాక్ వాటర్ పెరగడం, వెల్గటూరు వైపు నుండి గోదావరిలో కలిసే పెద్ద వాగు వర్షం కారణంగా ఉప్పొంగడంతో ఈ వంతెన మునిగిపోయింది.

జనగామ టౌన్, ఆగస్టు 2: జనగామలో అమలు చేస్తున్న 144సెక్షన్‌ను వెంటనే ఎత్తివేయాలని డిమాండ్ చేస్తూ పిసిసి అధ్యక్షుడు ఉత్తమ్‌కుమార్‌రెడ్డి, వర్కింగ్ ప్రెసిడెంట్ భట్టి విక్రమార్క, పిసిసి మాజీ చీఫ్ పొన్నాల లక్ష్మయ్య మంగళవారం హైదరాబాద్‌లో గవర్నర్ నరసింహన్‌ను కలిసి వినతిపత్రం అందచేసినట్లు కాంగ్రెస్ పార్టీ పట్టణ అధికార ప్రతినిధి రంగరాజు ప్రవీణ్‌కుమార్ తెలిపారు.