విజయవాడ: 2017 జూన్‌ 2లోపు ఏపీకి వచ్చినవారికి స్థానికత వర్తింపు చేస్తామని ఏపీ ప్రభుత్వం మార్గదర్శకాలు విడుదల చేసింది. తెలంగాణ నుంచి ఏపీకి వచ్చినవారికే స్థానికత వర్తింపు ఇస్తామని సర్కారు స్పష్టం చేసింది. స్థానికత ధ్రువీకరకణ పత్రం కావాల్సినవారు మూడు ఫారాలతో దరఖాస్తు చేసుకోవాలని సూచించింది. దరఖాస్తు చేసుకున్న ఏడు రోజుల్లో ధ్రువీకరణ పత్రం జారీ చేస్తామని చెప్పింది.

తిరుపతి: ఎర్రచందనం డంప్‌ను పోలీసులు కరకంబాడి రోడ్డులో సోమవారం స్వాధీనం చేసుకున్నారు. ఎర్రచందనం విలువ 40 లక్షల వరకు ఉంటుందని పోలీసులు అంచనా వేశారు. ముగ్గురు నిందితులను పోలీసులు అరెస్ట్ చేశారు. నిందితుల్లో డెంటల్‌ డాక్టర్‌ శక్తివేలుకు చెన్నైలో డెంటల్‌ ఆస్పత్రి ఉన్నట్లు పోలీసులు గుర్తించారు. చెన్నై రెడ్‌హిల్స్‌లో బినామీ పేర్లతో ఆరు భవనాలు ఉన్నాయి. శక్తివేలు తమ్ముడు మనోహర్‌ పరారయ్యాడు.

విజయవాడ: రాష్ట్రాన్ని కరవుఛాయలు లేని ప్రాంతంగా తీర్చిదిద్దాలని ఎపి సిఎం చంద్రబాబు సోమవారం నీరు-ప్రగతి కార్యక్రమం సమీక్ష సందర్భంగా జరిగిన టెలికాన్ఫరెన్స్‌లో అధికారులను ఆదేశించారు. నీరు-ప్రగతి అమలులో అలసత్వం పనికిరాదని, జలవనరులు అందరికీ దక్కాలని, పర్యావరణాన్ని కాపాడాలని అన్నారు. ఈ ఏడాది అక్టోబర్ 2 నాటికి బహిరంగ మలవిసర్జన లేని రాష్ట్రంగా ఎపిని మార్చాలన్నారు.

హైదరాబాద్: తెలుగురాష్ట్రాల ఉమ్మడి గవర్నర్ ఇఎస్‌ఎల్ నరసింహన్‌ను ఎపి సిఎం చంద్రబాబు సోమవారం ఉదయం రాజ్‌భవన్‌లో కలిశారు. ఈనెల 12 నుంచి ఎపిలో జరిగే కృష్ణా పుష్కరాలకు హాజరుకావాల్సిందిగా గవర్నర్‌ను ఆయన ఆహ్వానించారు. రాష్ట్రంలో తాజా పరిస్థితులు, విభజన చట్టంలో హామీలు, ప్రత్యేక హోదా, కేంద్రం నిధులు తదితర అంశాలు కూడా వీరిమధ్య ప్రస్తావనకు వచ్చినట్టు సమాచారం.