రాజమహేంద్రవరం/్భద్రాచలం, ఆగస్టు 9: జీవనది గోదావరి అంత్య పుష్కర క్రతువు చివరి ఘట్టానికి చేరింది. ఇక కేవలం 48 గంటలు మాత్రమే గోదావరి నదిలో పుష్కర ప్రభావం ఉండనుండటంతో స్నానాలకు భక్త జనం తహతహలాడుతున్నారు. చివరి రెండు రోజుల్లో గోదావరి నది అంత్య పుష్కర స్నానం ముగించుకుని 12వ తేదీ నుంచి ప్రారంభమయ్యే కృష్ణా పుష్కరాలకు భక్తులు వెళ్ళే అవకాశం ఉందని అధికార యంత్రాంగం అంచనావేస్తున్నారు.

చిత్తూరు, ఆగస్టు 9: కుప్పం నియోజకవర్గంలో అభివృద్ధి పనులు వేగవంతం చేసి స్మార్ట్ కుప్పంగా తీర్చిదిద్దాలని ముఖ్యమంత్రి చంద్రబాబునాయుడు అధికారులను ఆదేశించారు. నియోజకవర్గ పర్యటనలో భాగంగా రెండోరోజు మంగళవారం కుప్పంలోని రోడ్లు భవనాలశాఖ అతిథి గృహంలో పలు అంశాలపై అధికారులు, ప్రజాప్రతినిధులతో చర్చించారు. కుప్పం కోర్ కమిటీ సభ్యులతో పాటు స్మార్ట్ కుప్పం ప్రతినిధులతోను ముఖ్యమంత్రి చర్చించారు.

ఆత్మకూరు, అగస్టు 9: కర్నూలు జిల్లా కొత్తపల్లి మండలంలోని సప్తనదీ సంగమేశ్వరాలయం మంగళవారం పూర్తిగా నీట మునిగింది. సాయంత్రం చివరిసారిగా శిఖర దర్శన భాగ్యం భక్తులకు కలిగింది. శ్రీశైలం జలాశయం నీటిమట్టం అంతకంతకు పెరుగుతుండడంతో ఆలయం క్రమంగా నీటిమునిగింది. ప్రస్తుతం ఆలయ శిఖరంపై ఉన్న ధ్వజం మాత్రమే కనిపిస్తోంది. మరో రెండు రోజుల్లో అదికూడా మునిగిపోతుందని భావిస్తున్నారు.

విజయవాడ, ఆగస్టు 9: మరో రెండు రోజుల్లో ప్రారంభంకానున్న కృష్ణ పుష్కరాలకు ఏర్పాట్లు దాదాపూ పూర్తయ్యాయని పుష్కరాల ప్రత్యేక అధికారి రాజశేఖర్ తెలియచేశారు. మంగళవారం ఆయన ఇక్కడ ఏర్పాటు చేసిన విలేఖరుల సమావేశంలో మాట్లాడుతూ 11వ తేదీన ఇబ్రహీంపట్నం వద్ద ఉన్న పవిత్ర సంగమంలో పుష్కరాలు లాంఛనంగా ప్రారంభమవుతాయని తెలిపారు.