విజయవాడ, సెప్టెంబర్ 28: అమెరికా పర్యటన ముగించుకుని గన్నవరం విమానాశ్రయానికి వచ్చిన ముఖ్యమంత్రి చంద్రబాబునాయుడుకు తెలుగుదేశం పార్టీ శ్రేణులు ఘనంగా శుక్రవారం స్వాగతం పలికాయి. తెల్లవారుజామున నాలుగున్నర గంటలకు వచ్చిన ముఖ్యమంత్రికి మంత్రులు దేవినేని ఉమా మహేశ్వర రావు, కొల్లు రవీంద్ర తదితరులు స్వాగతం పలికారు.

విజయవాడ, సెప్టెంబర్ 28: రాష్ట్ర ప్రభుత్వం ప్రధాన కార్యదర్శి(సీఎస్)గా అనిల్‌చంద్ర పునేఠాను నియమిస్తూ రాష్ట్ర ప్రభుత్వం శుక్రవారం రాత్రి ఉత్తర్వులు జారీ చేసింది. అనేకమంది ఈ పదవికి పోటీ పడినప్పటికీ సీసీఎల్‌ఏగా పని చేస్తున్న పునేఠాను ముఖ్యమంత్రి చంద్రబాబు ఎంపిక చేశారు. ప్రస్తుతం సీఎస్‌గా వ్యవరిస్తున్న దినేష్‌కుమార్ ఈ నెల 30న పదవీ విరమణ చేయనున్నారు.

నరసరావుపేట, సెప్టెంబర్ 28: అక్టోబర్ 2న గాంధీ జయంతి సందర్భంగా రాష్ట్రంలోని ప్రజలందరూ మరుగుదొడ్లు, రోడ్లు, శ్మశానాలను శుభ్రం చేసుకోవాలని శాసనసభ స్పీకర్ డాక్టర్ కోడెల శివప్రసాదరావు పిలుపునిచ్చారు. శుక్రవారం గుంటూరు జిల్లా నరసరావుపేటలోని ఆయన క్యాంప్ కార్యాలయలం ఏర్పాటు చేసిన విలేఖరుల సమావేశంలో మాట్లాడుతూ ఇదే గాంధీ మహాత్మునికి ఇచ్చే నిజమైన నివాళి అన్నారు. ఈ కార్యక్రమాన్ని ఉద్యమంలా తీసుకోవాలన్నారు.

తిరుపతి, సెప్టెంబర్ 28: ప్రపంచ ప్రఖ్యాతి గాంచిన ధార్మిక క్షేత్రం టీటీడీ పాలనా వ్యవస్థను కేంద్ర సాంస్కృతిక శాఖ అధికారుల కమిటీ శుక్రవారం పరిశీలించింది. స్థానిక శ్రీపద్మావతి విశ్రాంతి గృహంలో టీటీడీ అధికారులతో ఈ బృందం సమావేశమైంది. తిరుమల జేఈఓ శ్రీనివాసరాజు ఈ సందర్భంగా టీటీడీ కార్యకలాపాలను వివరించారు. ఈ సందర్భంగా జేఈఓ శ్రీనివాసరాజు ముందుగా ధర్మకర్తల మండలి, ఈఓ, జేఈఓల విధులను వివరించారు.