రాజస్థాన్ రాష్ట్ర ప్రభుత్వం అవినీతిని అధికార గణానికి ప్రాథమిక హక్కుగా గుర్తించినట్లుంది. ఆ మేరకు హక్కుకు భంగం కలగకుండా అన్ని చర్యలు తీసుకోవాలని భావించినట్లుంది. ఇంతవరకూ ఆర్డినెన్స్ రూపంలో ఉండి, ఇప్పుడు రాజస్థాన్ శాసనసభలో బిల్లుగా ప్రవేశపెట్టబడిన చట్టం తీరుతెన్నులు చూస్తే కరడుగట్టిన నియంతలైనా ఆ బరితెగింపునకు విస్తుపోతారు.

తెలంగాణ రాష్ట్రంలో అమలు చేస్తున్న ‘ఆసరా’ పథకం చాలామంది పేదలను ఆదుకుంటున్నది. అయితే ఈ పథకం పరిధిలోకి కేన్సర్ బాధితులను కూడా చేర్చాలి. ఖరీదైన వైద్యం చేయించుకోలేని పేదలకు ఈ పథకం కొండంత ధైర్యాన్ని ఇస్తుంది. ముఖ్యమంత్రి కెసిఆర్ ఈ దిశగా చర్యలు తీసుకోవాలి. మారిన జీవనశైలి, వంశపారంపర్య, జన్యు కారణాల వల్ల, స్వీయతప్పిదాల వల్ల కేన్సర్ బారిన పడుతున్నవారి సంఖ్య రోజురోజుకు పెరుగుతోంది.

మన దేశానికి ఇప్పుడు బుల్లెట్ రైళ్లు అవసరమేమిటని సణుగుడు ప్రారంభం అయింది. స్వాతంత్య్రం వచ్చిన తొలి సంవత్సరాల్లో సైన్యంపై ఖర్చుని విమర్శించారు. నెహ్రూ దృక్పథమూ అదే. చైనా మనమీద యుద్ధానికి వచ్చినపుడు మన సైనికులకు సరైన బూట్లు కూడా లేవు. తగినంతగా ఆయుధాలు, మందుగుండు లేవు. ఓటమి, చైనా మోసం తట్టుకోలేక నెహ్రూ కన్నుమూశారు. ఉపగ్రహ ప్రయోగాలు ఎందుకని కొందరు విమర్శించారు.

పార్లమెంటు ప్రాంగణంలో విప్లవవీరుడు అల్లూరి సీతారామరాజు కాంస్య విగ్రహాన్ని ప్రతిష్ఠించాలన్న డిమాండ్ ఇప్పటిది కాదు. 2006లో అప్పటి ఎంపి దివంగత కింజరాపు ఎర్రన్నాయుడు ఎన్టీఆర్, అల్లూరిల విగ్రహాలను పార్లమెంటు ప్రాంగణంలో ఏర్పాటు చేయాలని సభలో ప్రస్తావించడం, కేంద్రప్రభుత్వం సానుకూలంగా స్పందించడం తెలిసిందే. ఆ తరువాతి పరిణామాల్లో ఎన్టీఆర్ విగ్రహాన్ని అక్కడ ఏర్పాటు చేశారుగాని, మన్యం వీరుడిని మరిచిపోయారు.