సింగపూర్: సింగపూర్ ప్రభుత్వ సాంకేతిక వ్యవస్థపై అతి పెద్ద సైబర్ దాడి జరిగింది. ఈ దాడి వెనక ప్రభుత్వంలోని కొంత మంది వ్యక్తులే కారణమై ఉండవచ్చని సింగపూర్ ప్రభుత్వం అనుమానిస్తోంది. సింగపూర్ ఆరోగ్య శాఖలో సాంకేతిక విభాగ వ్యవస్థపై జరిగిన సైబర్ దాడిలో 1.5 మిలియన్ల సింగపూర్ ప్రజల ఆరోగ్య సమాచారం తస్కరణకు గురైనట్లు ప్రభుత్వం పేర్కొంది. ప్రధానమంత్రి కార్యాలయానికి చెందిన డాటాపై కూడా సైబర్ దాడి జరిగింది.

వాషింగ్టన్, జూలై 20: మిస్సోరిలో ఒక సరస్సులో ఆకస్మికంగా వచ్చిన గాలి తుపాను వల్ల ఒక నావ మునిగి 17 మంది మరణించారు. మరో ముగ్గురు గల్లంతయ్యారు. ప్రమాదం సంభవించిన సమయంలో నావలో 31 మంది ప్రయాణీకులు ఉన్నారు. ఈ నావ ఆంఫీబియస్ టెక్నాలజీతో తయారు చేశారు. భూమి మీద మోటారులాగా డ్రైవ్ చేయవచ్చు. నీటిలో తేలుతూ వెళుతుంది. మరణించిన వారిలో పిల్లలు ఎక్కువ మంది ఉన్నారు. ఏడుగురిని ఆస్పత్రిలో చేర్పించారు.

ఇస్లామాబాద్, జూలై 19: ఎన్నికల ప్రచార సభల్లో పాల్గొంటున్నప్పుడు లేదా ఇంటర్వ్యూలు, విలేఖరుల సమావేశాల్లో మాట్లాడుతున్నప్పుడు ఉపయోగించే బాషపై జాగ్రత్తలు తీసుకోవాలని పాకిస్తాన్ ఎన్నికల కమిషన్ (ఈసీపీ) మాజీ క్రికెటర్, తెహ్రీక్ ఇ ఇన్సాఫ్ పార్టీ చీఫ్ ఇమ్రాన్ ఖాన్‌ను హెచ్చరించింది. ప్రతిపక్ష పార్టీలనుగానీ, నాయకులనుగానీ అనుచిత భాషలో విమర్శించడం తగదని హితవు పలికింది.

లాహోర్, జూలై 18: పాకిస్తాన్‌లో రాబోయే ఎన్నికల్లో ఒకవేళ తమ పార్టీ అధికారంలోకి వస్తే, నవాజ్ షరీఫ్ తమ్ముడు షాబాజ్ షరీఫ్‌కే ప్రధాన మంత్రి పదవి దక్కుతుందని పాకిస్తాన్ ముస్లిం లీగ్-నవాజ్ (పీఎంఎల్-ఎన్) సీనియర్ నేత, మాజీ ప్రధాని షాహిద్ ఖకాన్ అబ్బాసీ స్పష్టం చేశారు. అయితే, తుది నిర్ణయం పార్టీలో తీసుకునే నిర్ణయాన్ని బట్టి ఉంటుందని అన్నారు.