న్యూఢిల్లీ: నేతాజీ సుభాష్ చంద్రబోస్ జయంతి సందర్భంగా ప్రధాన మంత్రి నరేంద్ర మోదీ ఆయనకు ఘన నివాళులర్పించారు. ఈమేరకు ట్విట్ చేశారు. నేతాజీ దేశానికి చేసిన సేవలను, ధైర్యసాహసాలను కొనియాడారు. ధైర్యసాహసాలను, దేశభక్తిని భారతీయులంతా గుర్తుంచుకోవాలన్నారు. కేంద్ర హోంశాఖ మంత్రి రాజ్‌నాథ్‌సింగ్, బీజేపీ జాతీయ అధ్యక్షుడు అమిత్‌షాతోపాటు పలువురు నేతాజీకి నివాళులర్పించిన వారిలో ఉన్నారు.

రాజమండ్రి: టిడిపి యువనేత, ఎ.పి. సి.ఎం. చంద్రబాబు తనయుడు నారా లోకేష్ జన్మదినం సందర్భంగా శనివారం ఇక్కడ సినీ హీరో, ఎమ్మెల్యే నందమూరి బాలకృష్ణ కేక్ కట్ చేశారు. తాను నటించే 100వ సినిమాకు ప్రస్తుతం చర్చలు జరుగుతున్నాయని, మంచి కథ దొరికితే త్వరలోనే షూటింగ్ ప్రారంభిస్తామని ఆయన తెలిపారు. జిహెచ్‌ఎంసి ఎన్నికల్లో టిడిపి తరఫున ప్రచారం చేసే విషయమై హైదరాబాద్ వెళ్లాక నిర్ణయం తీసుకుంటానని బాలయ్య తెలిపారు.

ఏలూరు: చేపల చెరువుపై వివాదం ఫలితంగా ఏలూరు మండలం ప్రతికోళ్ల లంక గ్రామంలో శనివారం పోలీసులు నిషేదాజ్ఞలు విధించారు. శుక్రవారం జరిగిన ఘర్షణకు సంబంధించి 53 మంది గ్రామస్థులను పోలీసులు అదుపులోకి తీసుకున్నారు. చేపలచెరువు వివాదంపై హైకోర్టు తీర్పు ఈరోజు వెలువడనున్న దృష్ట్యా ఉభయ వర్గాలు సంయమనం పాటించాలని పోలీసులు విజ్ఞప్తి చేశారు.

నల్గొండ: యాదగిరిగుట్టలో తెలంగాణ రాష్ట్ర ప్రభుత్వ ప్రధాన కార్యదర్శి రాజీవ్ శర్మ శనివారం ఉదయం పూజలు చేశారు. ఆలయం వద్ద ఆయనకు అర్చకులు పూర్ణకుంభంతో స్వాగతం పలికారు. సిఎస్ వెంట జిల్లా కలెక్టర్, తదితర అధికారులు పాల్గొన్నారు. యాదగిరిగుట్ట ఆలయ అభివృద్ధి సంస్థ సమావేశంలో రాజీవ్‌శర్మ పాల్గొంటారు.