న్యూఢిల్లీ, ఆగస్టు 25: బాలికపై అత్యాచార ఘటన ఢిల్లీ వసంత్‌కుంజ్ ప్రాంతంలో ఉద్రిక్తతకు దారితీసింది. ఘటనతో రెచ్చిపోయిన ఆందోళనకారులు రాళ్లు రువ్వుతూ విధ్వంసానికి దిగారు. పలు కార్లు ధ్వంసం కాగా సుమారు పదిమందికి పైగా పోలీసులు గాయాలపాలయ్యారు. శుక్రవారం రాత్రి జరిగిన ఈ ఘటనకు సంబంధించి ఇరవైమంది నిందితులను అరెస్టు చేసినట్లు పోలీసులు తెలిపారు.

శ్రీనగర్, ఆగస్టు 25: కాశ్మీర్ హక్కులను పరిరక్షించేందుకు 35ఏ అధికరణను రద్దు చేసే ప్రయత్నం మంచిది కాదని కాంగ్రెస్ సీనియర్ నేత మణిశంకర్ అయ్యర్ అన్నారు. ఈ అధికరణను రద్దు చేసేందుకు ఎటువంటి ప్రయత్నం జరగరాదన్నారు. సుప్రీంకోర్టు జాతీయ ప్రయోజనాలను దృష్టిలో పెట్టుకుని ఈ అధికరణపై నిర్ణయం తీసుకుంటుందని ఆశిస్తున్నట్లు ఆయన చెప్పారు. ఈ అధికరణ జోలికి ఎవరూవెళ్లరాదన్నారు. రాజ్యాంగంలో 35ఏ భాగమని చెప్పారు.

న్యూఢిల్లీ, ఆగస్టు 25: నూతన జోనల్ వ్యవస్థకు సంబంధించిన రాష్టప్రతి ఉత్తర్వులు రెండు, మూడు రోజుల్లో వచ్చే అవకాశాలున్నాయని లోక్‌సభ సభ్యుడు వినోద్ కుమార్ తెలిపారు. ప్రధాని ఈ మేరకు హామీ ఇచ్చారని శనివారం విలేఖరులతో మాట్లాడు తూ అన్నారు. కేసీఆర్ మరోసారి జోనల్ వ్యవస్థకు సంబంధించి రాష్టప్రతి ఉత్తర్వులను సవరించవలసిన ఆవశ్యకతను ప్రధానికి వివరించారని ఆయన తెలిపారు.

భువనేశ్వర్: దేశంలో కొత్తగా 22 ఎయిమ్స్‌లు ఏర్పాటు చేయనున్నట్టు కేంద్ర ఆరోగ్య మంత్రి జేపీ నడ్డా శనివారం ఇక్కడ వెల్లడించారు. వైద్య, ఆరోగ్య శాఖలో నిపుణుల కొరత ఉందని, దాన్ని భర్తీ చేయడానికి చర్యలు తీసుకుంటున్నట్టు ఆయన స్పష్టం చేశారు. వైద్య విద్యలో ఉన్నత ప్రమాణాలు పెంపొదించేందుకు కేంద్రం కృత నిశ్చయంతో ఉందని నడ్డా తెలిపారు.