న్యూఢిల్లీ, జనవరి 13: పెద్ద నోట్ల రద్దు అంశంపై ప్రధాని నరేంద్ర మోదీని విచారించేది లేదని, ఆయనకు సమన్లు పంపబోమని ప్రజాపద్దుల కమిటీ (పిఎసి) స్పష్టం చేసింది. పెద్ద నోట్ల రద్దుపై వివరణ కోరేందుకు మోదీని పిలిచే అవకాశం ఉందంటూ కాంగ్రెస్ సభ్యుడు, పిఎసి చైర్మన్ కెవి థామస్ చేసిన వాదనను పిఎసి తోసిపుచ్చింది. బిజెపి సభ్యుల అభ్యంతరాలు కూడా ఇందుకు దారితీశాయి.

న్యూఢిల్లీ, జనవరి 13:కొత్త ఆలోచనలకు తమ ప్రభుత్వం పట్టం కడుతుందని, అన్ని విధాలుగా ప్రోత్సాహాన్ని అందిస్తుందని ప్రధాని మోదీ స్పష్టం చేశారు. ప్రభుత్వ అధికారులు సమగ్ర ఆలోచనా దృక్పథంతోనే ముందుకు వెళ్లాలని, గట్టి ఫలితాలపైనే దృష్టి పెట్టాలని కోరారు.

న్యూఢిల్లీ, జనవరి 13: కొత్త పేదరికం రేఖపై ఒక అభిప్రాయానికి రావడం కోసం నీతి ఆయోగ్ త్వరలోనే ఒక నిపుణుల కమిటీని ఏర్పాటు చేస్తుందని ప్రభుత్వ ఉన్నతాధికారి ఒకరు చెప్పారు. పేదరికానికి సంబంధించి చాలా రాష్ట్రాల అభిప్రాయాలు కలవనందున దీనిపై ఒక నిపుణుల కమిటీ అవసరమని తాము ఇంతకు ముందే చెప్పామని, నిపుణుల కమిటీని ఇంకా నియమించలేదు కానీ, త్వరలోనే ఏర్పాటు చేస్తామని ఆ అధికారి చెప్పారు.

తిరువనంతపురం, జనవరి 13: కేరళలో అత్యం త ఎత్తయిన పర్వతాల్లో ఒకటయిన అగస్త్య కూడమ్‌ను మహిళలు ఎక్కడంపై ఎలాంటి నిషేధం లేదని ఆ రాష్ట్ర అటవీ శాఖ మంత్రి కె రాజు శుక్రవారం స్పష్టం చేశారు. కొండ శిఖరంపైకి వెళ్లేటప్పుడు మహిళలు ఇబ్బందులు ఎదుర్కోవలసి వస్తుందని మాత్రమే అటవీ శాఖ తెలియజేసింది తప్ప పర్వతం ఎక్కడంపై ఎలాంటి నిషేధం లేదని మంత్రి స్పష్టం చేశారు.