దిల్లీ: దేశద్రోహం కేసులో అరెస్టయిన జెఎన్‌యు విద్యార్థి సంఘం నేత కన్నయ్యకుమార్ ఇటీవల అఫ్జల్‌గురు జయంతి సందర్భంగా దేశానికి వ్యతిరేకంగా ఎలాంటి నినాదాలు చేయలేదని దిల్లీ ప్రభుత్వం నిర్వహించిన న్యాయ విచారణలో తేలింది.

కోల్‌కత: ఫార్వర్డ్ బ్లాక్ పార్టీ సీనియర్ నాయకుడు అశోక్ ఘోష్ (94) కొంతకాలంగా అనారోగ్యంతో బాధపడుతూ గురువారం ఉదయం కన్నుమూశారు. నేతాజీ సుభాష్‌చంద్ర బోస్ స్ఫూర్తితో ఆయన ఫార్వర్డ్ బ్లాక్‌లో చేరి స్వాతంత్ర సమరంలో పాల్గొన్నారు. వామపక్ష నేతగా జాతీయ స్థాయిలో విశేష సేవలందించిన ఘోష్ మృతి పట్ల పశ్చిమ బెంగాల్ ముఖ్యమంత్రి మమతా బెనర్జీ తీవ్ర సంతాపం వ్యక్తం చేశారు.

దిల్లీ: దివంగత మాజీ ప్రధాని, తన తండ్రి రాజీవ్ గాంధీ హంతకులను విడుదల చేసే విషయంలో కేంద్రానిదే తుది నిర్ణయమని, ఈ అంశంపై తానేమీ మాట్లాడలేనని కాంగ్రెస్ ఉపాధ్యక్షుడు రాహుల్ అన్నారు. రాజీవ్ హంతకులు పాతికేళ్లుగా జైలులో ఉన్నందున వారిని విడుదల చేసే విషయంలో తుది నిర్ణయం చెప్పాలంటూ తమిళనాడు హోం శాఖ కార్యదర్శి కేంద్ర హోం శాఖకు తాజాగా లేఖ రాసిన సంగతి తెలిసిందే.

శ్రీనగర్: పుల్వామా జిల్లాలో గురువారం ఉదయం జరిగిన ఎదురుకాల్పుల సంఘటనలో ముగ్గురు ఉగ్రవాదులు మరణించారు. డాడ్సారా ప్రాంతంలో ఉగ్రవాదులు ఉన్నట్లు అనుమానించిన భద్రతా సిబ్బంది అక్కడికి చేరుకోగా, కాల్పులు ప్రారంభమయ్యాయి. ఎదురుకాల్పుల్లో హిజ్బుల్ ఉగ్రవాద సంస్థకు చెందిన ముగ్గురు మరణించారని, భద్రతా సిబ్బంది తెలిపారు.