న్యూఢిల్లీ, నవంబర్ 9: పెద్దనోట్ల రద్దు చేసి రెండేళ్లయిన సందర్భంగా యువజన కాంగ్రెస్ కార్యకర్తలు శుక్రవారం ఢిల్లీలోని ఆర్‌బీఐ కార్యాలయం వద్ద ధర్నా చేశారు. డిమోనిటైజేషన్ ప్రజల జీవితాలను అస్తవ్యస్తం చేసిందని, నరేంద్రమోదీ ప్రభుత్వం దేశ ఆర్థిక వ్యవస్థను సంక్షోభంలోకి నెట్టిందని ఆందోళనకారులు ధ్వజమెత్తారు. ఆర్‌బీఐ ఆఫీసు ఎదుట ఆందోళనకు దిగిన యువజన కాంగ్రెస్ కార్యకర్తలను పోలీసులు అరెస్టుచేశారు.

లక్నో: వారణాసిలో గంగానదిపైన తొలి జల రవాణా మార్గం ఏర్పాటుకు నిర్మించిన బహుళ టర్మినల్ వ్యవస్థను ప్రధాని నరేంద్రమోదీ ఈ నెల 12వ తేదీ సోమవారం జాతికి అంకితం చేస్తారు. తక్కువ ఖర్చు, పర్యావరణ పరిరక్షణకు జలరవాణా ఉపయోగపడుతుంది. ఈ నదిపై జల రవాణా అభివృద్ధికి మూడు టర్మినల్స్‌ను నిర్మిస్తున్నారు. ఇందులో తొలి టర్మినల్ నిర్మాణం పూర్తయింది.

చెన్నై: తమిళనాడు ప్రభుత్వ ఒత్తిడికి ‘సర్కార్’ నిర్మాతలు తలొగ్గారు. జయలలితకు సంబంధించిన అభ్యంతరకర సన్నివేశాలను తొలగించేందుకు నిర్ణయించారు. ఈ మేరకు జయలలితకు సంబంధించిన సన్నివేశాల్లో ఆమె మాటలు వినిపించకుండా మ్యూట్ చేసేందుకు అంగీకరిస్తూ ఈ మేరకు ఎడిటింగ్ చేసిన వెర్షన్‌ను శుక్రవారం నుంచి ప్రదర్శించనున్నామని నిర్మాతలు వెల్లడించారు.

చత్తీస్‌గఢ్: మావోయిస్టుల నుంచి రాష్ట్రానికి విముక్తి కల్పిస్తామని ప్రధాని నరేంద్ర మోదీ అన్నారు. ఆయన జగదల్‌పూర్‌లో ఎన్నికల సభలో మాట్లాడుతూ అర్భన్ నక్సల్స్‌కు కాంగ్రెస్ మద్దతునిస్తుందని అన్నారు. అర్భన్ నక్సల్స్ ఏసీ కారుల్లో తిరుగుతూ తమ పిల్లలను విదేశాల్లో చదివిస్తూ ఆదీవాసీల జీవితాలను చిధ్రం చేస్తున్నారని విమర్శించారు. తమ ప్రభుత్వం వచ్చిన తరువాత రాష్ట్రం అభివృద్ధి వైపు పయనిస్తుందని అన్నారు.