హైదరాబాద్, జనవరి 18: అధిక రద్దీని నివారించేందుకు గాను దక్షిణ మధ్య రైల్వే ఈ నెల 20, 21 తేదీల్లో కాకినాడ నుంచి సికింద్రాబాద్ వరకు రెండు ప్రత్యేక రైళ్లను నడుపుతున్నట్లు ప్రకటించింది. ఈ నెల 20న కాకినాడ టౌన్ నుంచి సికింద్రాబాద్ వరకు నెం.07002 ప్రత్యే క రైలు బయలుదేరుతుండగా, ఈ నెల 21న 07004 ప్రత్యేక రైలు కాకినాడ టౌన్ నుంచి బయలుదేరుతుందని రైల్వే వెల్లడించింది.

విజయవాడ, జనవరి 18: మహారాష్ట్ర గవర్నర్ సీహెచ్ విద్యాసాగరరావు సతీసమేతంగా గురువారం ఉదయం విజయవాడ కనకదుర్గమ్మను దర్శించుకున్నారు. దేవస్థానం అధికారులు ఆయనకు ఆలయ మర్యాదలతో, పూర్ణకుంభంతో వేదవాయిద్యాలతో స్వాగతం పలికారు. అనంతరం గవర్నర్ విద్యాసాగరరావు సతీమణి వినోదిని, కుమార్తె రజనిలతో కలిసి కనకదుర్గమ్మకు ప్రత్యేక పూజలు చేశారు. ఈ సందర్భంగా ఆలయ అర్చకులు ఆశీర్వచనాలు అందజేశారు.

హైదరాబాద్, జనవరి 18: అగ్రి గోల్డ్‌ను స్వాధీనం చేసుకోవడంపై స్టేటస్ రిపోర్టును ఇవ్వాలని హైకోర్టు గురువారం ఎస్సెల్ జీ గ్రూప్ సుభాష్ చంద్ర ఫౌండేషన్‌ను ఆదేశించింది. ఈ ఆదేశాలను హైకోర్టు ధర్మాసనం జారీ చేసింది. ఈ కేసును జస్టిస్ వి రామసుబ్రహ్మణ్యం, జస్టిస్ ఎస్‌వి భట్‌తో కూడిన ధర్మాసనం విచారించింది. అగ్రిగోల్డ్‌ను టేకోవర్ చేసుకోవడంలో జరుగుతున్న జాప్యంపై హైకోర్టు అసంతృప్తి వ్యక్తం చేసింది.

హైదరాబాద్, జనవరి 18: ఐటీ, పరిశ్రమలశాఖ మంత్రి కల్వకుంట్ల తారకరామారావు రెండో రోజు జపాన్‌లో పర్యటన కొనసాగింది. ఈ సందర్భంగా సుజుకి మోటార్స్ కార్పొరేషన్ చైర్మన్ ఒసాము సుజికితో సమావేశమయ్యారు. తెలంగాణ రాష్ట్రం ఆటోమొబైల్ రంగానికి అత్యంత ప్రాధాన్యత ఇస్తుందని కేటీఆర్ వివరించారు. తెలంగాణ ప్రభుత్వం ప్రవేశపెట్టిన పారిశ్రామిక విధానాన్ని (టిఎస్-ఐపాస్) కేటీఆర్ వివరించగా సుజుకి ప్రశంసించారు.