జగిత్యాల, డిసెంబర్ 16: పసుపు బోర్డు ఏర్పాటు చేయాలని కోరుతూ సోమవారం జిల్లాలోని పసుపు రైతులు జగిత్యాల జిల్లా కేంద్రంలో బైక్ ర్యాలీతో వెళ్ళి ప్రజావాణికి చేరుకొని నిరసన వ్యక్తం చేసారు. అనంతరం జగిత్యాల - కరీంనగర్ జాతీయ రహదారిపై బైఠాయించి ధర్నా నిర్వహించారు. దీంతో పెద్ద ఎత్తున వాహనాలు నిలిచిపోయి వాహనాల రాకపోకలకు అంతరాయం ఏర్పడింది.

తిప్పర్తి, డిసెంబర్ 16: దామరచర్ల యాదాద్రి థర్మల్ పవర్‌ప్లాంట్ కోసం భూములు కోల్పోయిన భూనిర్వాసితులకు న్యాయం జరిగే వరకు కృషి చేస్తానని పీసీసీ అధ్యక్షుడు, నల్లగొండ ఎంపీ ఉత్తమ్‌కుమార్‌రెడ్డి అన్నారు. నల్లగొండ జిల్లా తిప్పర్తిలో సోమవారం మిర్యాలగూడ నుంచి హైద్రాబాద్ వెళ్తున్న సందర్భంగా ఆగి కార్యకర్తలతో కలిసి కరచలనం చేశారు. మండల సమస్యలపై మాజీ జడ్పీటీసీ తండు సైదులగౌడ్, ఎంపీ దృష్టికి తీసుకొచ్చారు.

హైదరాబాద్, డిసెంబర్ 16: తెలంగాణలో ఐటీ పరిశ్రమ అభివృద్ధిపై తమకు చాలా సానుకూల అభిప్రాయం ఉందని కెనడా వౌలిక వసతుల శాఖ మంత్రి ప్రసాద్ పండా వెల్లడించారు. ఈ రంగంలో పెట్టుబడులు పెట్టడానికి తమ పారిశ్రామిక వర్గాలు ఆసక్తి కనబరుస్తున్నట్టు ఆయన చెప్పారు. హైదరాబాద్ వచ్చిన ఆయన సోమవారం ఐటీ, పరిశ్రమల శాఖ మంత్రి కల్వకుంట్ల తారక రామారావుతో సమావేశమయ్యారు.

హైదరాబాద్: తెలంగాణ రాష్ట్రంలో ఉష్ణోగ్రతలు పడిపోతున్నాయి. దాదాపు అన్ని జిల్లాలో చలి తీవ్రత కొంతమేరకు పెరిగింది. గాలిలో తేమ 83శాతం నమోదు అయిందని వాతావరణ శాఖ అధికారులు తెలిపారు. వికారాబాద్ జిల్లాలో అత్యల్పంగా 14 డిగ్రీల ఉష్ణోగ్రత నమోదు అయింది. గరిష్ట ఉష్ణోగ్రత 29 డిగ్రీలు, కనిష్ట ఉష్ణోగ్రత 19 డిగ్రీలుగా నమోదు అయింది.