హైదరాబాద్, సెప్టెంబర్ 1: వరంగల్లు అర్బన్ జిల్లా ఐనవోలు మల్లిఖార్జున స్వామి దేవాలయ ట్రస్టు బోర్డును నియమిస్తూ దేవాదాయ శాఖ ఉత్తర్వులు జారీ చేసింది. పాలకవర్గం ప్రమాణస్వీకారం చేసినప్పటి నుంచి ఏడాది వరకు అమల్లో ఉంటుందని తెలిపింది. ఈ ట్రస్టుకు ఆలయ ఉప ప్రధాన అర్చకుడు నందనం శివరాజయ్య ఎక్స్‌అఫీషియో సభ్యుడిగా ఉంటారని తెలిపింది.

హైదరాబాద్, సెప్టెంబర్ 1: శాస్త్ర పరిశోధనా ఫలితాలు సామాన్యులకు చేరిన నాడే దాని ప్రయోజనం ఒనగోరుతుందని, శాస్త్ర పరిశోధనా సంస్థల్లో జరుగుతున్న పరిశోధనలు, వాటి ఫలితాలపై కూడా సామాన్యులకు అవగాహన కల్పించాలని రక్షణ శాఖ సలహాదారు డాక్టర్ సతీష్‌రెడ్డి పేర్కొన్నారు. సిఎస్‌ఐఆర్ రజతోత్సవాలు సందర్భంగా జహీర్ మెమోరియల్ హైస్కూల్ గ్రౌండ్స్‌లో జరిగిన ప్రత్యేక ప్రదర్శనా కార్యక్రమంలో ఆయన పాల్గొన్నారు.

హైదరాబాద్, సెప్టెంబర్ 1: రాష్ట్రంలో నిషేధిత భూముల రిజిష్ట్రేషన్లకు సంబంధించి తలెత్తిన వివాదాలను పరిష్కరించేందుకు గాను తెలంగాణ ప్రభుత్వం ప్రత్యేక కమిటీని నియమించింది. ఈ కమిటీకి చైర్మన్‌గా భూ పరిపాలన శాఖ కమిషనర్, సభ్యులుగా రిటైర్డు జడ్జి సయ్యద్ లతీఫ్ ఉర్ రహ్మాన్, సభ్య కన్వీనర్‌గా భూ రికార్డులు, సర్వే సెటిల్‌మెంట్ కమిషనర్‌ను నియమిస్తూ ప్రభుత్వం ఉత్తర్వులు జారీ చేసింది.

హైదరాబాద్, సెప్టెంబర్ 1: కాంట్రిబ్యూటరీ పెన్షన్ స్కీమ్‌ను రద్దు చేస్తూ పాత పెన్షన్ విధానాన్ని పునరుద్ధరించాలని డిమాండ్ చేస్తూ తెలంగాణలోని టీచర్లు, లెక్చరర్లు, వివిధ యూనివర్శిటీల్లోని బోధన, బోధనేతర సిబ్బంది, వివిధ సంస్థల్లో ఉద్యోగులు ఎలుగెత్తి డిమాండ్ చేశారు. ఈ సందర్భంగా శుక్రవారం నాడు వారంతా పింఛను విద్రోహదినం కార్యక్రమంలో పాల్గొన్నారు. ఉద్యోగులు సామూహిక సెలవు పాటిస్తూ నిరసన వ్యక్తం చేశారు.