హైదరాబాద్: తెలంగాణలోని కేపీహెచ్‌బీ కాలనీలో ఒక మహిళకు కరోనా వైరస్ సోకింది. దీంతో తెలంగాణలో కరోనా బాధితుల సంఖ్య 21కి చేరింది. కేపీహెచ్‌బీ కాలనీలోని ఫేస్-2లో ఒక మహిళకు శనివారం నిర్వహించిన పరీక్షల్లో కరోనా పాజిటివ్‌గా తేలింది. దీంతో ఆమెను గాంధీ ఆసుపత్రిలోని ఐసోలేషన్ సెంటర్‌కు తరలించారు. కరోనా సోకిన మహిళ కుటుంబంలోని సభ్యులకు కూడా కరోనా సోకి ఉండవచ్చని భావిస్తున్నారు.

విజయవాడ: ప్రధాని నరేంద్ర మోదీ ఇచ్చిన పిలుపు మేరకు రేపు అందరం స్వచ్ఛందంగా జనతా కర్ఫ్యూ పాటిద్దామని ఏపీ డీజీపీ గౌతం సవాంగ్ ప్రజలకు విజ్ఞప్తి చేశారు. పోలీసులు అన్ని పోలీసు స్టేషన్లలో అందుబాటులో ఉంటారని, కంట్రోల్ రూమ్ ద్వారా ఎప్పటికప్పుడు పర్యవేక్షిస్తామని, అత్యవసర సేవల కోసం 100కి డయల్ చేయవచ్చని తెలిపారు.

కర్నూలు, మార్చి 19: కరోనా వైరస్ విస్తరిస్తున్న నేపధ్యంలో శ్రీశైలం దేవస్థానం అధికారులు కఠిన నిర్ణయాలు తీసుకుంటున్నారు. ఒక్కొక్కటిగా అన్నీ బంద్ చేయిస్తున్నారు. మల్లికార్జున స్వామి దర్శనానికి వస్తున్న భక్తులకు వీలైనంత త్వరగా దర్శనాలు చేయించి తిరిగి స్వస్థలాలకు పంపుతున్నారు. ఇప్పటికే శ్రీగిరిపై ఉన్న అన్ని దుకాణ సముదాయాలను మూసివేయాలని అధికారులు ఆదేశాలు జారీ చేశారు.

హైదరాబాద్, మార్చి 19: దేశవ్యాప్తంగా కరోనా విజృంభిస్తున్న నేపథ్యంలో పబ్లిక్ సర్వీసు కమిషన్‌లో రక్షిత చర్యలను చేపట్టినట్టు కమిషన్ చైర్మన్ ప్రొఫెసర్ ఘంటా చక్రపాణి చెప్పారు. గురువారం నాడు కమిషన్ కార్యాలయంలో సీనియర్ అధికారులతో సమీక్ష చేసిన అనంతరం పలు చర్యలు చేపట్టినట్టు ఆయన చెప్పారు. కార్యాలయంలో పారిశుద్ధ్య పరిశుభ్రతకు అత్యధిక ప్రాధాన్యత ఇస్తున్నట్టు చెప్పారు.