ఏలూరు, ఆగస్టు 1 : రాష్ట్రానికి ప్రత్యేక హోదా విషయంలో రాజీపడేది లేదని పేర్కొంటూ మంగళవారం జిల్లా బంద్‌ను నిర్వహించనున్నారు. ఈ విషయంలో కేంద్రంలోని బిజెపి, రాష్ట్రంలోని టిడిపిలు ప్రజలను మోసగిస్తున్నాయంటూ వైకాపా తీవ్రస్థాయిలో ధ్వజమెత్తుతూ బంద్‌కు పిలుపునిచ్చింది. మరోవైపు ప్రత్యేక హోదా అంశానికి సంబంధించి అన్నిపక్షాలు మద్దతు పలుకుతూ వైకాపా బంద్‌కు సంఘీభావం ప్రకటించాయి.

విజయనగరం(టౌన్), ఆగస్టు 1:ప్రజలు ఎదుర్కొంటున్న సమస్యలపై వినతులను అధికారులు స్వీకరించారు. సోమవారం కలెక్టరేట్‌లోని మీ-కోసం గ్రీవెన్స్‌కు పలువురు తమ సమస్యలను చెప్పుకునేందుకు వచ్చి వినతిపత్రాలు అందజేశారు. వ్యక్తిగత సామాజిక సమస్యలపై వినతులు అందాయి. హాస్టళ్ల మూసివేత కారణంగా సుమారు 40 మంది కాంట్రాక్టు, ఔట్ సోర్సింగ్ సిబ్బంది కోల్పోయిన ఉద్యోగాలను భర్తీచేయాలని కోరుతూ వినతిపత్రం అందజేశారు.

విశాఖపట్నం, ఆగస్టు 1: ఎపికి ప్రత్యేక హోదా తక్షణమే ప్రకటించాలని కోరుతూ వైఎస్సార్ కాంగ్రెస్, కాంగ్రెస్, వామపక్ష పార్టీలు సహా పలు ప్రజా సంఘాల ఆధ్వర్యంలో నేడు బంద్ నిర్వహించనున్నారు. రాజ్యసభలో ఆర్థిక మంత్రి అరుణ్‌జైట్లీ చేసిన ప్రసంగం ద్వారా రాష్ట్రానికి ప్రత్యేక హోదా కల్పించలేమన్న భావన కల్పించారని అధికార టిడిపితో సహా విపక్షాలు ఆరోపిస్తున్నాయి.

ఒంగోలు,ఆగస్టు 1:రాష్ట్రానికి ప్రత్యేకహోదా ఇవ్వాలని డిమాండ్ చేస్తూ జిల్లావ్యాప్తంగా బంద్ జరగనుంది. ఈ బంద్‌లో వైఎస్‌ఆర్ కాంగ్రెస్‌పార్టీ, కాంగ్రెస్ వామపక్షాలు, విద్యార్థి సంఘాల నాయకులు పాల్గొననున్నాయి. ముందుగా వైఎస్‌ఆర్ కాంగ్రెస్‌పార్టీ నాయకులు మంగళవారం వేకువజామున నాలుగుగంటలకు స్థానిక ఆర్‌టిసి గ్యారేజి వద్దకు వెళ్ళి బస్సులను నిలుపుదల చేయనున్నారు.