హైదరాబాద్, ఆగస్టు 1: ఆంధ్రప్రదేశ్‌లో చెరువులు, నదులలోని ఇసుక తవ్వకాలకు పొక్లెయినర్లను వినియోగించడంపై నేషనల్ గ్రీన్ ట్రిబ్యునల్ దక్షిణాది జోన్ (చెన్నై) నిషేధం విధించింది. మాజీ ఎమ్మెల్యే దేవినేని రాజశేఖర్ దాఖలు చేసిన పిటిషన్‌ను పరిశీలించిన జస్టిస్ పి జ్యోతిమణి, సభ్యుడు పి ఎస్ రావులతో కూడిన బెంచ్ ఈ మేరకు ఉత్తర్వులు జారీ చేసింది.

న్యూఢిల్లీ, ఆగస్టు 1: విభజన హామీల అమలుకు ఎన్డీయే ప్రభుత్వం అన్ని చర్యలూ తీసుకుంటుందని బీజేపీ ఎంపీ హరిబాబు అన్నారు. సొమవారం ఆయన విలేఖరులతో మాట్లాడుతూ, హోదా విషయంలో ఉన్న ఇబ్బందులను అధిగమించి ఏపీకి ఏం సహాయం చేయాలన్న దానిపై కేంద్రం కసరత్తు చేస్తోందన్నారు. ఏపీని ఆదుకోవాడానికి ఉన్న అన్ని ప్రత్యామ్నాయాలను కేంద్రం పరిశీలిస్తోందని అన్నారు. ఏపీని అన్ని విధాలుగా అందుకుంటుందని స్పష్టం చేశారు.

న్యూఢిల్లీ, ఆగస్టు 1: కేంద్రం ప్రభుత్వం ప్రత్యేక హోదా ఇవ్వలేమని స్పష్టం చేసిన తరుణంలో రాష్ట్ర ప్రజల నుండి వ్యతిరేకత రావడంతోనే హోదాపై ముఖ్యమంత్రి చంద్రబాబు నాయుడు మాట మారుస్తున్నారని వైకాపా పార్లమెంట్ పార్టీ నాయకుడు మేకపాటి రాజమోహన్ రెడ్డి విమర్శించారు. ఏపీ ముఖ్యమంత్రికి చంద్రబాబుకు ప్రత్యేకహోదా ఇవ్వలేమని ప్రధాన మంత్రి లీక్ చేసి ఉంటారని ఆయన అనుమానం వ్యక్తం చేశారు.

హైదరాబాద్, ఆగస్టు 1: ఆంధ్రప్రదేశ్ పబ్లిక్ సర్వీసు కమిషన్ ( ఎపిపిఎస్‌సి) ద్వారా జరిపే ప్రత్యక్ష నియామకాలకు నిర్వహించే పరీక్ష విధివిధానాలను ప్రభుత్వం సోమవారం నాడు ఖరారు చేసింది. గ్రూప్ -1ఎ పరీక్ష 825 మార్కులకు , గ్రూప్ 1బి పరీక్ష 450 మార్కులకు, పంచాయతీ సెక్రటరీల ఎంపిక పరీక్ష 300 మార్కులకు నిర్వహించనున్నారు.