తిరుపతి: పెత్తందార్ల పాలనతో నిజమైన తెలంగాణ రాదని, దొరల ఆధిపత్యాన్ని అడ్డుకునేందుకు తాము నిరంతరం పోరాడతామని టి.టిడిపి నేత మోత్కుపల్లి నర్సింహులు అన్నారు. టిడిపి మహానాడులో శనివారం ఆయన మాట్లాడుతూ, తెలంగాణలో పార్టీ బలోపేతం చేసే బాధ్యతలను బడుగువర్గాల నేతలకు అప్పగించాలని సూచించారు.

తిరుపతి: నవ్యాంధ్ర రాజధాని అమరావతి చరిత్రను ఆధారంగా చేసుకుని ఎమ్మెల్యే, సినీనటుడు నందమూరి బాలకృష్ణ ‘గౌతమీపుత్ర శాతకర్ణి’ సినిమా తీయడం అభినందనీయమని టిడిపి అధినేత, సిఎం చంద్రబాబు పార్టీ మహానాడులో ప్రశంసించారు. ఈ సినిమాతో అమరావతి చరిత్ర ప్రపంచానికంతా తెలుస్తుందన్నారు. కాగా, రాజధాని నిర్మాణానికి భూములిచ్చిన రైతులకు పాదాభివందనం చేస్తున్నానని ఆయన అన్నారు.

హైదరాబాద్: చిత్తూరు జిల్లా నగరి నుంచి ప్రాతినిధ్యం వహిస్తున్న వైకాపా ఎమ్మెల్యే రోజా ఎన్నిక చెల్లదంటూ హైకోర్టులో పిటిషన్ దాఖలైంది. రాయుడు అనే వ్యక్తి దీన్ని దాఖలు చేశారు. ఆ పిటిషన్‌ను కొట్టివేయాలని రోజా కూడా పిటిషన్ వేశారు. దీంతో రెండు పిటిషన్లనూ ఒకేసారి విచారిస్తామని హైకోర్టు చెప్పడాన్ని వ్యతిరేకిస్తూ రోజా సుప్రీం కోర్టును ఆశ్రయించారు. వచ్చే నెలాఖరులోగా ఆ పిటిషన్ విచారణకు వస్తుంది.

విజయవాడ: ఎన్నికల ముందు ఇచ్చిన హామీలను విస్మరించి ప్రజలను చంద్రబాబు వంచించినందుకు రాష్ట్ర వ్యాప్తంగా అన్ని పోలీస్ స్టేషన్లలో కేసులు పెడతామని వైకాపా నేతలు ధర్మాన ప్రసాదరావు, బొత్స సత్యనారాయణ శనివారం ఇక్కడ మీడియాకు తెలిపారు. చంద్రబాబు ప్రజా వ్యతిరేక పాలనకు నిరసనగా జూన్ 2న సభలు, సమావేశాలు నిర్వహిస్తామన్నారు. టిడిపి మహానాడులో చంద్రబాబు అన్నీ అబద్ధాలు చెబుతున్నారని వారు ఆరోపించారు.