శ్రీకాకుళం: రేగిడి మండలం సంకిలి వద్ద ఓ ప్రైవేటు సుగర్ ఫ్యాక్టరీలోని బాయిలర్‌లో పడి ముగ్గురు కార్మికులు శుక్రవారం మరణించారు. యాజమాన్యం నిర్లక్ష్యం వల్లే ఈ దారుణం జరిగిందని కార్మికులు ఆరోపిస్తున్నారు. తగిన నష్టపరిహారం ప్రకటించనంతవరకూ మృతదేహాలను తరలించే ప్రసక్తి లేదని బాధిత కుటుంబాల వారు ఫ్యాక్టరీ వద్ద ఆందోళనకు దిగారు.

తిరుపతి : తెలుగుదేశం పార్టీ నికర ఆస్తులు రూ.52కోట్లుగా మహానాడులో శుక్రవారం ప్రకటించారు. పార్టీ కోశాధికారి, మంత్రి రాఘవరావు ఈ మేరకు పార్టీ జమాఖర్చుల వివరాలను ప్రకటించారు. 2015-16 ఆర్థిక సంవత్సరానికి సంబంధించి పార్టీకి సంబంధించిన ఆర్థిక లావాదేవీలను అన్నిటినీ ఆయన ప్రకటించారు. పార్టీ సభ్యత్వం, విరాళాల రూపంలో ఈ ఏడాది మార్చి నెలాఖరు వరకు వచ్చిన మొత్తం ఆదాయం రూ.15కోట్లు.

తిరుపతి: రాష్ట్ర విభజనను పురస్కరించుకుని వచ్చే నెల 2న నవనిర్మాణ దీక్షను చేపడతామని టిడిపి అధినేత, ఎపి సిఎం చంద్రబాబు ఇక్కడ జరుగుతున్న పార్టీ మహానాడులో తెలిపారు. 3 నుంచి 8వ తేదీ వరకూ రాష్ట్ర వ్యాప్తంగా జనచైతన్య కార్యక్రమాలు ఉంటాయన్నారు. చివరి రోజున 8వ తేదీన రాష్ట్ర పునర్నిర్మాణం కోసం మహాసంకల్పం నిర్వహిస్తామన్నారు.

హైదరాబాద్: ఎపికి ప్రత్యేకహోదా హామీని నెరవేర్చడంలో బిజెపి నేతలు విఫలమయ్యారని ఆంధ్రప్రదేశ్ కాంగ్రెస్ కమిటీ అధ్యక్షుడు రఘువీరారెడ్డి శుక్రవారం ఆరోపించారు. ప్రత్యేకహోదాపై మాట మార్చిన కేంద్ర మంత్రి వెంకయ్యనాయుడు ఎపికి భారీగా నిధులు ఇస్తున్నట్లు చెప్పడంలో అర్థం లేదన్నారు. హోదా ఇవ్వడం వల్ల పెద్దగా ప్రయోజనం ఉండదని కూడా బిజెపి నేతలు అనడం దారుణమన్నారు.