విశాఖ: బంగాళాఖాతంలో ఏర్పడిన ‘రోను’ తుపాను ఒడిశా తీరం వైపు పయనిస్తోంది. దీంతో కోస్తాంధ్ర జిల్లాలకు ముప్పు తప్పినట్టేనని వాతావరణ శాఖ అధికారులు అంచనా వేస్తున్నారు. శ్రీకాకుళం జిల్లా కళింగపట్నానికి ఆగ్నేయంగా 40 కిలోమీటర్ల దూరంలో తుపాను స్థిరంగా కదులుతోంది. ఇది ఈరోజు రాత్రికి ఒడిశా తీరంలో బలమైన తుపానుగా మారే అవకాశం ఉంది.

గుంటూరు: ఎపికి ప్రత్యేక హోదా సాధించేవరకూ తాము వివిధ స్థాయిల్లో పోరాటం చేస్తామని ఎపి పిసిసి అధినేత రఘువీరారెడ్డి ప్రకటించారు. ఆయన శుక్రవారం ఇక్కడ మీడియాతో మాట్లాడుతూ, ప్రత్యేక హోదా, తెలంగాణలో అక్రమ ప్రాజెక్టులపై ముఖ్యమంత్రి చంద్రబాబు గొంతు విప్పడం లేదని విమర్శించారు. ఓటుకు నోటు కేసు భయంలో కెసిఆర్ అంటే బాబుకు భయం పట్టుకుందన్నారు. తెలంగాణ ప్రాజెక్టుల వల్ల రాయలసీమకు అన్యాయం జరుగుతుందన్నారు.

హైదరాబాద్: విమానంలో ఓ మహిళ పట్ల అసభ్యకరంగా ప్రవర్తించినట్లు ఆరోపణలు ఎదుర్కొంటున్న విజయవాడ టిడిపి కార్పొరేటర్ ఉమ్మడి వెంకటేశ్వరరావు (చంటి) శంషాబాద్ ఎయిర్‌పోర్టు పోలీసులకు లొంగిపోయారు. వారం రోజుల్లోగా విచారణకు హాజరుకాకుంటే అరెస్టు చేస్తామని పోలీసులు నోటీసులు జారీ చేయడంతో ఆయన స్వయంగా లొంగిపోయారు. కార్పొరేటర్‌ను అరెస్టు చేసినట్లు పోలీసులు తెలిపారు.

చిత్తూరు: చిత్తూరు జిల్లా ఎర్రావారిపాళ్యం అటవీ ప్రాంతంలో శుక్రవారం ఉదయం పోలీసులు ఆకస్మిక తనిఖీలు చేసి ఆరుగురు ఎర్రచందనం స్మగ్లర్లను అరెస్టు చేశారు. ఎర్ర చందనం దుంగలతో పాటు ఆరుకార్లను వీరి నుంచి స్వాధీనం చేసుకున్నారు.