న్యూఢిల్లీ, మార్చి 1: ఎస్ బ్యాంక్ వాటాలు శుక్రవారం దాదాపు 3శాతం లాభపడ్డాయి. ఈ బ్యాంకు మేనేజింగ్ డైరెక్టర్, చీఫ్ ఎగ్జిక్యూటివ్ ఆఫీసర్‌గా మూడేళ్ల కాల వ్యవధికి రవనీత్ గిల్ బాథ్యతలు చేపట్టినట్టు బ్యాంకు అధికారులు ప్రకటించిన వెంటనే స్టాక్ మార్కెట్‌లో ఈ బ్యాంకు వాటాలకు సానుకూలతలు ఆరంభం కావడం గమనార్హం.

న్యూఢిల్లీ, మార్చి 1: దేశ, విదేశాల్లో డిమాండ్ తగ్గడంతో శుక్రవారం బంగారు, వెండి ధరలు తగ్గుముఖం పట్టాయి. 10 గ్రాములు (తులం) బంగారంపై 120 రూపాయలు తగ్గి 34,080 రూపాయలు పలికింది. అలాగే వెండి ధరలు సైతం కిలోపై 370 రూపాయలు తగ్గి 40,680కి దిగివచ్చింది. పరిశ్రమల యూనిట్లు, నాణేల మార్కెట్ల నుంచి డిమాండ్ తగ్గడంతో ఈ పరిస్థితి నెలకొందని వ్యాపార వర్గాలు తెలిపాయి.

ముంబయి, ఫిబ్రవరి 28: దేశంలో సిమెంట్ వినియోగం 2020లో 6 నుంచి 8 శాతం పెరిగే అవకాశాలున్నాయి. ప్రధానంగా కేంద్ర ప్రభుత్వం తక్కువ ఖర్చు గృహ నిర్మాణం, వౌలిక వసతుల కల్పనపై ప్రత్యేక దృష్టి సారించడం ఇందుకు దోహదం చేయవచ్చని ఇండియా రేటింగ్స్ అధ్యయన నివేదిక పేర్కొంది. వరుసగా ఈ సంవత్సరం కూడా డిమాండ్ అధికంగా ఉన్నందువల్ల సిమెంట్ తయారీదార్లు సైతం మంచి లాభాలను సంతరించుకునే వీలుందని తెలిపింది.

ముంబయి, ఫిబ్రవరి 28: ద్రవ్యోల్బణం వచ్చే అక్టోబర్ వరకు సుమారు 4 శాతానికి లోబడి ఉండే క్రమంలో వచ్చే ఆర్థిక సంవత్సరంలో రిజర్వు బ్యాంక్ ఆఫ్ ఇండియా (ఆర్‌బీఐ) వడ్డీ రేట్లపై 75 నుంచి 100 బేసిక్ పాయింట్ల మేర కోత విధించే అవకాశాలున్నాయి. ఈనెలలో తీసుకున్న కొన్ని విధాన నిర్ణయాల వల్ల మరో 25 బేసిస్ పాయింట్లు తగ్గే అవకాశం లేకపోలేదని విశే్లషకులు అంచనా వేస్తున్నారు.