న్యూఢిల్లీ, ఫిబ్రవరి 22: బులియన్ మార్కెట్ శుక్రవారం నష్టాలను చవిచూసింది. విదేశీ పెట్టుబడిదారులు అనాసక్తంగా వ్యవహరించడం, దేశీయ మదుపరుల నుంచి సరైన స్పందన లేకపోవడం బులియన్ మార్కెట్‌ను నిలువునా ముంచేసింది. 10 గ్రాముల పసిడి 330 రూపాయలు తగ్గి, 34,500 రూపాయలకు పతనమైంది. బంగారంతోపాటు వెండి ధరకూ పతనం తప్పలేదు. కిలో వెండి 300 రూపాయలు తగ్గడంతో, 41,360 రూపాయల వద్ద ముగిసింది.

న్యూఢిల్లీ, ఫిబ్రవరి 22: రిజర్వు బ్యాంకుతో సంబంధం లేకుండా స్వతంత్రంగా వ్యవహరించే ఓ రుణ యాజమాన్య కార్యాలయాన్ని ఏర్పాటు చేయాల్సిన అవసరం ఉందని నీతి ఆయోగ్ వైస్ చైర్మన్ రాజీవ్ కుమార్ సూచించారు. ‘పబ్లిక్ డెబ్ట్ మేనేజ్‌మెంట్ ఏజెన్సీ’(పీడీఎమ్‌ఏ) పేరిట ఏర్పాటు చేసే ఈ ఏజెన్సీ విషయాన్ని గతంలో 2015 బడ్జెట్ సమావేశంలో కేంద్ర ఆర్థిక మంత్రి అరుణ్ జైట్లీ ప్రతిపాదించారని ఈ సందర్భంగా రాజీవ్‌కుమార్ గుర్తు చేశారు.

న్యూఢిల్లీ: రిటైర్డ్ ఉద్యోగుల పీఎఫ్ డిపాజిట్లపై వడ్డీని 2018-19 సంవత్సరానికి గాను 8.65 శాతంగా నిర్ణయించినట్టు కేంద్ర కార్మిక శాఖ మంత్రి సంతోష్ గంగ్వార్ తెలిపారు. గత ఏడాది ఇది 8.55 శాతం ఉండగా, ఈ ఏడాది స్వల్పంగా పెంచినట్టు చెప్పారు. ఈపీఎఫ్‌ఓ సెంట్రల్ బోర్డు ఆఫ్ ట్రస్టీస్ (సీబీటి)తో జరిగిన సమావేశంలో ఈ మేరకు అంగీకారం కుదిరినట్టు ఆయన చెప్పారు.

సియోల్, ఫిబ్రవరి 21: భారత ఆర్థిక రంగం బలమైనదని, రానున్న రోజుల్లో మార్కెట్ సైజు ఐదు ట్రిలియన్ డాలర్లకు చేరుకుంటుందని ప్రధానమంత్రి నరేంద్రమోదీ చెప్పారు. భారత్‌లో పెట్టుబడులు పెట్టేందుకు మంచి అవకాశాలు ఉన్నాయని ఆయన చెప్పారు. ప్రపంచం మొత్తం మీద మరే ఇతర దేశం కూడా భారత్ లాగా సాలీనా ఏడు శాతం వృద్ధిరేటును సాధించడం లేదన్నారు.