న్యూఢిల్లీ, మార్చి 26: ప్రముఖ విదేశీ ఆటోరంగ సంస్థ ఫోర్డ్.. భారతీయ మార్కెట్‌లో తమ వాహన ధరలను పెంచాలని యోచిస్తోంది. వచ్చే నెల ఏప్రిల్ నుంచి అన్ని రకాల మోడళ్ల ధరలను 2 శాతం వరకు పెంచనున్నట్లు తెలుస్తోంది. పెరిగిన ఉత్పాదక వ్యయమే ధరల పెంపునకు కారణమని ఫోర్డ్ ఇండియా అధికార ప్రతినిధి పిటిఐతో అన్నారు.

ముంబయి, మార్చి 26: ప్రైవేట్‌రంగ బ్యాంకింగ్ దిగ్గజం హెచ్‌డిఎఫ్‌సి బ్యాంక్ మేనేజింగ్ డైరెక్టర్ ఆదిత్య పురి.. ప్రపంచ అత్యుత్తమ 30 మంది సిఇఒల్లో ఒకరిగా నిలిచారు. అమెరికన్ ఫైనాన్షియల్ మ్యాగజైన్ బారోన్స్ ఈ జాబితాను ప్రచురించింది. 66 ఏళ్ల పురి.. హెచ్‌డిఎఫ్‌సి బ్యాంక్‌ను ప్రపంచ శ్రేణి బ్యాంక్‌గా మలచడంలో విశేషంగా శ్రమించారు.

విజయనగరం, మార్చి 25: దేశంలో ఎయిర్ కార్గో సేవలను విస్తృతం చేయనున్నట్టు కేంద్ర పౌర విమానయాన శాఖ మంత్రి అశోక్ గజపతిరాజు వెల్లడించారు. శనివారం ఇక్కడ తనను కలిసిన విలేఖరులతో ఆయన మాట్లాడుతూ ఎయిర్ కార్గోను బలోపేతం చేసేందుకు అవసరమైన చర్యలు తీసుకుంటున్నామన్నారు. ప్రపంచ ఎయిర్ కార్గో సేవల్లో భారత్ వెనుకంజలో ఉందన్నారు. అందుకే రానున్న కాలంలో ఈ సేవలను విస్తృతం చేసేందుకు అవసరమైన చర్యలు తీసుకుంటున్నామన్నారు.

విజయవాడ, మార్చి 25: ప్రభుత్వరంగ విమానయాన సంస్థ ఎయిరిం డియా.. విశాఖ నుంచి కొత్తగా విమాన సర్వీసులను ప్రారంభించనున్నది. ఏప్రిల్ 1 నుంచి ఎటిఆర్ ఎయిర్ క్రాఫ్ట్ ద్వారా విశాఖ కేంద్రంగా ఈ సర్వీసులు నడపనున్నారు. ఒక్క బుధవారం మినహా మిగిలిన అన్ని రోజులు ఈ నూతన విమాన సర్వీసులు నడుస్తాయి. విశాఖపట్నంలో ఉదయం 6.30 గంటలకు బయలుదేరే ఎఐ 9527 విమాన సర్వీసు.. విజయవాడ మీదుగా ఉదయం 9.00 గంటలకు తిరుపతి చేరుకుంటుంది.