భారతీయ మార్కెట్‌లోకి జపాన్ ఆటోరంగ దిగ్గజం టొయోటా.. తమ లగ్జరీ బ్రాండైన లెక్సస్ కార్లను శుక్రవారం తీసుకొచ్చింది. వీటిలో ఆర్‌ఎక్స్ హైబ్రిడ్ మోడల్ ధర 1.07 కోట్ల రూపాయలుగా ఉంటే, ఆర్‌ఎక్స్ ఎఫ్ స్పోర్ట్ హైబ్రిడ్ మోడల్ ధర 1.09 కోట్ల రూపాయలుగా ఉంది. ఇఎస్ 300హెచ్ హైబ్రిడ్ సెడాన్ ధర 55.27 లక్షల రూపాయలుగా ఉంది. టాప్ ఎండ్ ఎస్‌యువి ఎల్‌ఎక్స్450డి మోడల్‌నూ సంస్థ పరిచయం చేయగా, దీని ధరను మాత్రం ప్రకటించలేదు.

న్యూఢిల్లీ, మార్చి 24: వాహనాల ధరలను పెంచుతున్నట్లు వోల్వో ఆటో ఇండియా ప్రకటించింది. వచ్చే నెల ఏప్రిల్ నుంచి తమ అన్ని మోడల్స్‌పై 2 శాతం వరకు ధరలను పెంచనున్నట్లు స్పష్టం చేసింది. పెరిగిన ఉత్పాదక వ్యయం వల్లే ధరలను పెంచాల్సి వస్తోందని ఓ ప్రకటనలో శుక్రవారం సంస్థ తెలియజేసింది.

హైదరాబాద్, మార్చి 24: వచ్చే ఏడాది ఐటి రంగంలో కొత్తగా 25 వేల ఉద్యోగాలను కల్పించాలని లక్ష్యంగా పెట్టుకోవాలనుకుంటున్నట్లు రాష్ట్ర ప్రభుత్వం ఐటి రంగంపై విడుదల చేసిన పద్దులో ప్రకటించింది. ఈ ఏడాది ఇంతవరకు 15 వేల ఉద్యోగాలను కల్పించాలనే లక్ష్యాన్ని ప్రభుత్వం సాధించగా, 65 వేల కోట్లకుగాను ఫిబ్రవరి నాటికి 62 వేల కోట్ల రూపాయల విలువ చేసే ఉత్పత్తులను ఎగుమతి చేసింది.

హైదరాబాద్, మార్చి 24: తెలంగాణ రాష్ట్రంలో ఏరోస్పేస్, డిఫెన్స్ కేటగిరిలోని కాంపోజిట్ పరిశ్రమలకు ఉజ్వల భవిష్యత్ ఉందని తెలంగాణ రాష్ట్ర పరిశ్రమలు, వౌలిక సదుపాయాల సంస్థ చైర్మన్ జి బాలమల్లు తెలిపారు. హైదరాబాద్ కేంద్రంగా ఈ పరిశ్రమలు మరింత అభివృద్ధి చెందేలా తెలంగాణ ప్రభుత్వం, టిఎస్‌ఐఐసి తరఫున పారిశ్రామికవేత్తలకు అన్ని విధాల సహకారం అందిస్తామని అన్నారు.