కృతయుగంలో తపస్సు, త్రేతాయుగంలో ఆత్మజ్ఞానం ద్వాపర యుగంలో యజ్ఞయాగాలు, కలియుగంలో దానధర్మాలు గొప్పవని పరాశర స్మృతి తెలియజేస్తుంది. దాన ధర్మాలు చేస్తే స్వర్గం సిద్ధిస్తుందని భవిష్యత్ పురాణం చెప్పుతోంది. కలియుగంలో ధర్మవర్తనమే ఉత్తమమని పెద్దలు చెప్తారు. ధర్మాన్ని మనం కాపాడితే మనల్ని ధర్మం కాపాడుతుందంటారు. ధర్మానికి హాని చేస్తే ఆ ధర్మమే హాని చేసినవారిని నాశనం చేస్తుందని మనుస్మృతి చెప్పుతుంది.

శ్రీరాముడు హిందువుల ఆరాధ్య దైవం. అతడి పుట్టినరోజే శ్రీరామనవమి. అవతార పురుషుల జన్మదినాల్లో కృష్ణాష్టమి, శ్రీరామనవమి ఎంతో ముఖ్యమైనవి. ఏటా చైత్రశుక్ల నవమినాడు మనమంతా శ్రీరామనవమి పండుగను ఎంతో భక్తిశ్రద్ధలతో జరుపుకుంటాం. వసంత నవరాత్రుల పేరిట రామదినోత్సవ వేడుకలు జరుపుతారు. ఈ పండుగను గురించి వ్రత చూడామణియందు అగస్త్య సంహితలో ఇలా వ్రాయబడింది.
చైత్రమాసే, నవమ్యాంతు జాతో రామస్స్వయంహరిః

దుష్టశిక్షణ శిష్ట రక్షణార్ధమై చైత్రశుద్ధ దశమినాడు ఐదు గ్రహాలు ఉచ్ఛస్థితిలో ఉన్న కాలమందు పునర్వసు నక్షత్రంతో కూడిన కర్కాటక లగ్నంలో పగటి సమయాన సాక్షాత్తు ఆ శ్రీహరియే కౌసల్యా పుత్రుడై ఈ భూమిపైన జన్మించిన పర్వదినాన్ని మనం ‘శ్రీరామనవమి’గా విశేషంగా జరుపుకుంటాం.
‘రామ’యనగా రమించుట అని అర్ధం. కావున మనము ఎల్లప్పుడు మన హృదయ కమలమందు వెలుగొందుచున్న ‘ఆ శ్రీరాముని’ కనుగొనుచుండవలెను.

మంచి చెడు పడుగు పేకలా కలగలసిన నేతలాగా ఈ సమాజం మనకు కనబడుతుంది. ధర్మరాజును ఒక్క చెడుగుణాలున్న వారిని తీసుకొని రమ్మని పంపిస్తే ఆయనకు మంచిగుణాలతో ఒప్పారుతున్న వారే కనిపించారట. అట్లానే దుర్యోధనుడిని ఒక్క మంచి గుణాలున్న వానిని తీసుకొని రమ్మని పంపితే అందరూ చెడుగుణాలున్న వారే తారస పడ్డారని వెనక్కు వచ్చాడట.