పూంచ్, అక్టోబర్ 31: జమ్మూకాశ్మీర్‌లోని పూంచ్, రాజౌరీ జిల్లాలో ఎల్‌ఓసి వద్ద పాక్ దళాలు మరోసారి కాల్పుల విరమణ ఒప్పందాన్ని ఉల్లంఘించాయి. రాజౌరీ సెక్టార్‌లో పాక్ రేంజర్లు భారత శిబిరాలను లక్ష్యంగా చేసుకుని భారీఎత్తున కాల్పులకు తెగబడ్డారు. పాక్ రేంజర్ల కాల్పుల్లో ఓ జవాను మృతి చెందాడని ఉత్తర మండల సైనిక ప్రతినిధి వెల్లడించారు.

న్యూఢిల్లీ, అక్టోబర్ 31: గత దశాబ్ద కాలంలో అసలు స్కూలుకు వెళ్లనివారు, అలాగే మధ్యలో మానేసిన వారి సంఖ్య దాదాపు పదికోట్లకు పైనే ఉంది. 5-19 సంవత్సరాల మధ్య వయస్సుకలిగిన పిల్లల్లో 6.54 కోట్ల మంది అసలు బడి ముఖమే తెలియదని, అలాగే 4కోట్ల 49 లక్షల మంది మధ్యలోనే చదువులు మానేశారని 2011 జనగణన వివరాలను బట్టి స్పష్టమవుతోంది. 5-19 సంవత్సరాల వయస్సు కలిగిన వారు దేశంలో 38.01 కోట్ల మంది ఉన్నారు.

ఢాకా, అక్టోబర్ 31: బంగ్లాదేశ్‌లో 15 హిందూ ఆలయాలను గుర్తుతెలియని వ్యక్తులు ధ్వంసం చేశారు. ఇస్లాం మతాన్ని కించపరిచేలా ఫేస్‌బుక్‌లో చేసిన కథనాలే ఆలయాలపై దాడులకు కారణమైంది. నసీర్‌నగర్ జిల్లాలోని బ్రహ్మణ బార్హియా ఆలయాలను ధ్వంసం చేశారు. హిందువులకు చెందిన వంద ఇళ్లను లూఠీ చేశారు. ఆదివారం ఈ సంఘటనలు చోటుచేసుకున్నాయి. దుండగులు రెచ్చిపోయి హబీగంజ్, మధాబ్‌పూర్ పక్కనే ఉన్న మరోరెండు ఆలయాలపై దాడులు చేశారు.

న్యూఢిల్లీ, అక్టోబర్ 31: అవినీతి నిర్మూలనలో ప్రజలు ముందుకు రావాలని సెంట్రల్ విజిలెన్సు కమిషనర్ కె.వి.చౌదరి పిలుపునిచ్చారు. సెంట్రల్ విజిలెన్స్ కమిషన్ ఏటా అక్టోబర్ 31న సర్దార్ వల్లభాయ్ పటేల్ జయంతిని పురస్కరించుకుని విజిలెన్స్ అవగాహన వారోత్సవాన్ని నిర్వహించింది. అనతరం చౌదరి విలేఖరులతో మాట్లాడుతూ ప్రజల భాగస్వామ్యంతో అవినితిని ఎలా నిర్మూలించవచ్చన్న ఆంశంపై అవగాహన పెంపొందిస్తామన్నారు.