ఎడ్జిబాస్టన్, జూన్ 5: చాంపియన్స్ ట్రోఫీలో డిఫెండింగ్ చాంపియన్ టీమిండియా అద్భుతంగా ఆడిందని పాకిస్తాన్ మాజీ కెప్టెన్ షాహిద్ అఫ్రిదీ వ్యాఖ్యానించాడు. నిజమైన ఫేవరిట్‌లా ఆడిందని కితాబునిచ్చాడు. ఉత్కంఠ భరితంగా, హోరాహోరీగా సాగుతుందనుకున్న మ్యాచ్ తమ జట్టు నీరుగారిపోవడంతో ఎంతో నిరుత్సాహాన్ని మిగిల్చిందని ఐసిసి పత్రికకు రాసిన తన వ్యాసంలో వాపోయాడు.

పారిస్: ఫ్రెంచ్ ఓపెన్ పురుషుల సింగిల్స్‌లో ప్రపంచ నంబర్ వన్ ఆటగాడు ఆండీ ముర్రే సులభంగా క్వార్టర్స్ చేరాడు. నాలుగో రౌండ్‌లో అతను కరెన్ కాచనొవ్‌ను 6-3, 6-4, 6-4 తేడాతో ఓడించాడు. కాగా, టైటిల్ వేటలో అతనికి రెండో ర్యాంక్ ఆటగాడు నొవాక్ జొకోవిచ్ నుంచి పోటీ తప్పకపోవచ్చు. మరో నాలుగో రౌండ్ మ్యాచ్‌లో జొకోవిచ్ 7-6, 6-1, 6-3 తేడాతో అల్బర్ట్ రామోస్ వినోలస్‌ను ఓడించాడు.

సిడ్నీ, జూన్ 5: చాలాకాలంగా తాము చేస్తున్న డిమాండ్లను అంగీకరిస్తూ, కొత్త కాంట్రాక్టు కుదుర్చుకోవాలని క్రికెట్ ఆస్ట్రేలియా (సిఎ) అధికారులకు ఆ జట్టు ఓపెనర్, వైస్-కెప్టెన్ డేవిడ్ వార్నర్ సూచించాడు. కాంట్రాక్టు కుదరితేనే ప్రతిష్ఠాత్మక యాషెస్ సిరీస్‌ను ఆడేందుకు సిద్ధమవుతానని, లేకపోతే, అందులో పాల్గొనే ప్రసక్తే లేదని ఒక చానెల్‌కు ఇచ్చిన ఇంటర్వ్యూలో వార్నర్ స్పష్టం చేశాడు.

ఎడ్జిబాస్టన్: భారత్, పాకిస్తాన్ జట్లతో వర్షం ఓ ఆట ఆడుకుంది. ఆదివారం నాటి చాంపియన్స్ ట్రోఫీ మ్యాచ్‌లో ఈ రెండు జట్లు తలపడగా, మొదట బ్యాటింగ్‌కు దిగిన భారత్ 9.5 ఓవర్లలో వికెట్ నష్టం లేకుండా 46 పరుగులు సాధించింది. ఈ దశలో వర్షం కురవడంతో ఆటకు అంతరాయం ఏర్పడింది. జల్లులు తగ్గడంతో ఆట కొనసాగింది. ఒక వికెట్ నష్టినికి 173 పరుగులకు చేరుకున్నప్పుడు మరోసారి భారీ వర్షం కురిసింది.