హైదరాబాద్, మార్చి 30: భారీగా పెంచిన బీమా ప్రీమియాన్ని తగ్గిస్తూ, సింగిల్ పర్మిట్ విధానాన్ని ప్రవేశపెట్టాలని కోరుతూ లారీ యజమానుల సంఘం గురువారం ఉదయం నుంచి సమ్మె చేపట్టింది. రెండు రోజుల క్రితం ప్రభుత్వంతో జరిపిన చర్చలు విఫలమవ్వడంతో గురువారంనుంచీ సమ్మెకు పిలుపునిచ్చిన సంగతి తెలిసిందే. ఈ మేరకు దక్షిణాది రాష్ట్రాల లారీ యజమానుల సంఘాలు గురువారం ఉదయం నుంచి సమ్మె మొదలుపెట్టాయి.

హైదరాబాద్, మార్చి 30:హైదరాబాద్‌నుంచి జాతీయ రహదారులపై ప్రతిపాదించిన మూడు స్కైవేలు 2018 డిసెంబర్ నాటికి పూర్తి చేసేలా ప్రణాళికలు సిద్ధం చేయాలని మున్సిపల్ వ్యవహారాల మంత్రి కెటిఆర్ అధికారులను ఆదేశించారు. నాగపూర్ హైవే, కరీంనగర్ హైవే, వరంగల్ హైవేలపై నిర్మించనున్న ఈ మూడు స్కైవేల నిర్మాణానికి 2,691 కోట్ల నిధుల వినియోగానికి పాలనాపరమైన అనుమతి ఇచ్చారు.

విజయవాడ (క్రైం), మార్చి 30: అగ్రిగోల్డ్ బాధితులకు అండగా ఉంటానని సినీ హీరో, జనసేన అధినేత పవన్ కల్యాణ్ భరోసా ఇచ్చారు. ఏజెంట్లకు రక్షణ కల్పించాల్సిన బాధ్యత ప్రభుత్వానిదేనన్నారు. ప్రభుత్వం తక్షణ చర్యగా 13లక్షల మంది చిన్న ఖాతాదారులకు రూ.1,180కోట్లు విడుదల చేయాలన్నారు.

అమరావతి, మార్చి 30: శాసనమండలి డిప్యూటీ చైర్మన్‌గా రెడ్డి సుబ్రహ్మణ్యం ఏకగ్రీవంగా ఎన్నికయ్యారు. ఇతరులెవరూ ఆ పదవికి నామినేషన్ వేయకపోవడంతో ఆయన ఎన్నిక ఏకగ్రీవమయింది. ఉభయ గోదావరి జిల్లాల్లో రాజకీయంగా ప్రభావం చూపే బీసీల్లోని శెట్టి బలిజ వర్గానికి చెందిన సుబ్రహ్మణ్యాన్ని ఆ పదవికి ఎంపిక చేస్తూ ముఖ్యమంత్రి, తెదేపా అధినేత చంద్రబాబునాయుడు గురువారం నిర్ణయం తీసుకున్నారు.