విశాఖపట్నం: రాజకీయ లబ్ది కోసమే సీఎం రమేష్ దీక్ష చేస్తున్నారని బీజేపీ ఎమ్మెల్సీ మాధవ్ వ్యాఖ్యానించారు. శుక్రవారం మీడియాతో మాట్లాడుతూ పార్లమెంట్ లాబీలో టీడీపీ ఎంపీల సంభాషణలు వారి చిత్తశుద్దికి నిదర్శనమన్నారు. బరువు తగ్గేందుకు దీక్షలు ఉపయోగపడతాయని మురళీమోహన్, అవంతి శ్రీనివాస్‌ మాట్లాడుకోవడాన్ని ప్రజలంతా చూశారని ఎమ్మెల్సీ మాధవ్ తెలిపారు.

తిరుపతి: తిరుమల శ్రీవారి ఆలయంలో ప్రతి 12 సంవత్సరాలకు ఒకసారి నిర్వహించే అష్టబంధన బాలాలయ మహాసంప్రోక్షణం ఆగస్టు 12 నుంచి 16వ తేదీ వరకు జరుగుతుందని టీటీడీ తిరుమల జేఈఓ శ్రీనివాస రాజు చెప్పారు. ఈ వైదిక కార్యక్రమాల ఏర్పాటుపై గురువారం తిరుమలలోని అన్నమయ్య భవనంలో అధికారులతో సమావేశమయ్యారు.

తిరపతి, జూన్ 28: తిరుమలలో గురువారం రాత్రి పౌర్ణమి గరుడ సేవ వైభవంగా జరిగింది. రాత్రి 7 గంటలకు సర్వాలంకార భూషితుడైన శ్రీ మలయప్ప స్వామివారు తన ఇష్ట వాహనమైన గరుత్మంతునిపై విహరిస్తూ భక్తులను అనుగ్రహించారు. ఈ సందర్భంగా ధర్మప్రచార పరిషత్, అన్నమాచార్య ప్రాజెక్టు కళాకారులు నాలుగు మాడీ వీధుల్లో కోలాహలంగా భజనలు, కోలాటాలు, చెక్క భజనలు నిర్వహించారు. ఈ కార్యక్రమంలో టీటీడీ ఉన్నతాధికారులు పాల్గొన్నారు.

హైదరాబాద్, జూన్ 28: గట్టు ఎత్తిపోతల పథకానికి ముఖ్యమంత్రి కల్వకుంట్ల చంద్రశేఖర్‌రావు శుక్రవారం శంకుస్థాపన చేస్తారు. గట్టు ఎత్తిపోతల ప్రాజెక్టుతో పాటు ఇప్పటికే చేపట్టిన తమ్మిళ్ల ఎత్తిపోతల పథకం పనులను అధికారులతో ముఖ్యమంత్రి సమీక్షించనున్నారు. ఇప్పటికే తుమ్మిళ్ల ప్రాజెక్టు పనులు ప్రారంభం కావడంతో శుక్రవారం తన పర్యటన సందర్భంగా సీఎం సమీక్షించనున్నారు.