జురాసిక్ పార్క్, జాస్, ఇండియాజోన్స్ వంటి చిత్రాల సృష్టికర్త స్టీవెన్ స్పిల్‌బెర్గ్ దర్శకత్వంలో వచ్చిన మరో ఫాంటసీ చిత్రం ‘బి.ఎఫ్.జి.’ (ది బిగ్ ఫ్రెండ్లీ జయంట్). డిస్నీ మరియు రిలయన్స్ ఎంటర్‌టైన్‌మెంట్స్ పతాకంపై రూపొందించిన ఈ చిత్రం ఇటీవల విడుదలైన సంగతి తెలిసిందే. ఈ చిత్రానికి సంబంధించిన రిలయన్స్ ఎంటర్‌టైన్‌మెంట్స్ ప్రతినిధి మాట్లాడుతూ చిత్రంలోని గ్రాఫిక్స్ అటు పిల్లలను, అటు పెద్దలను ఆకర్షిస్తున్నాయని, అన్ని భాషలలో మంచి సమీక్షలు కూడా లభించాయని తెలిపారు. కుటుంబ సమేతంగా చూడదగిన ఈ చిత్రంలో స్నేహపూర్వకమైన మహాకాయుడికి ఒక చిన్న పిల్లకి మధ్య జరిగిన అద్భుతమైన కథను దర్శకుడు అత్యుత్తమమైన సాంకేతిక పరిజ్ఞానంతో తెరకెక్కించారని ఆయన తెలిపారు. తెలుగు నటుడు జగపతిబాబు ఈ చిత్రంలోని ప్రధాన పాత్రకు డబ్బింగ్ చెప్పడం ఓ విశేషంగా అందరూ భావిస్తున్నారని అన్నారు.