ఇంఫాల్: ఈశాన్య రాష్ట్రాల్లో సైనికులకు ప్రత్యేక అధికారాల చట్టాన్ని రద్దు చేయాలని కోరుతూ 16 ఏళ్లుగా నిరాహార దీక్ష చేస్తున్న ‘మణిపూర్ ఉక్కుమహిళ’ షర్మిల తన ఆందోళనకు స్వస్తి చెప్పబోతున్నారు. ఆగస్టు9న నిరాహార దీక్షను ముగిస్తానని ఆమె మంగళవారం ఇక్కడ ప్రకటించారు. ఇక తాను ఎన్నికల్లో పోటీ చేస్తానని ఆమె తెలిపారు. ముక్కుకు అమర్చిన పైపుద్వారా అందించే ద్రవ పదార్థాలతో ఇన్నాళ్లూ ఆమె జీవిస్తున్నారు.

ఢిల్లీ: కేంద్ర ప్రభుత్వ ఉద్యోగులకు ఏడవ వేతన సంఘం సిఫారుసుల అమలుకు కేంద్ర ప్రభుత్వం మంగళవారం నోటిఫికేషన్ జారీ చేసింది. పెంచిన వేతనాలను ఆగస్టు నుంచి అందుకుంటారు. బేసిక్, పెన్షన్ పెంపునకు సంబంధించి 48 లక్షల మంది కేంద్ర ప్రభుత్వ ఉద్యోగులు, 52 లక్షల మంది పెన్షనర్లు లబ్ధి పొందనున్నారు.

కర్నూలు: పాణ్యం రైల్వేస్టేషన్‌ సమీపంలో మంగళవారం ఉదయం ఇద్దరు యువకులను గుర్తుతెలియని వ్యక్తులు గొంతు కోసి మృతదేహాలను పొలాల్లో పడేశారు. మృతులను కొలిమిగుండ్ల మండలం బోయఉప్పలపాడు గ్రామానికి దారా లక్ష్మయ్య, దారా ఓబులేశుగా పోలీసులు గుర్తించారు.

మంబయి: పుణెకు చెందిన ఆరుగురు విద్యార్థులు ప్రయాణిస్తున్న కారు అదుపుతప్పి పుణె-మంబయి రహదారిలో బోల్తా పడటంతో ఐదుగురు మృతి చెందగా మరో వ్యక్తి తీవ్ర గాయాలపాలయ్యాడు. మంగళవారం తెల్లవారుజామున ఈ ఘటనలో ముగ్గురు వ్యక్తులు అక్కడికక్కడే మృతి చెందగా మరో ముగ్గురు తీవ్రంగా గాయపడ్డారు. చికిత్స పొందుతూ మరో ఇద్దరు చనిపోగా, ఓ వ్యక్తి పరిస్థితి విషమంగా ఉన్నట్లు పోలీసులు తెలిపారు.