కడప: భవిష్యనిధి (పిఎఫ్) రుణాలను మంజూరు చేసేందుకు లంచం తీసుకుంటున్న పిఎఫ్ కార్యాలయం గుమస్తాను సిబిఐ అధికారులు మంగళవారం వలపన్ని పట్టుకున్నారు. నెల్లూరు జిల్లా కావలి మున్సిపాలిటీలో ముగ్గురు కార్మికులు తమ పిఎఫ్ ఖాతాల నుంచి రుణం కోసం దరఖాస్తు చేశారు. కడపలోని పిఎఫ్ కార్యాలయంలో గుమస్తా దానం ఇందుకు లంచం అడిగాడు. దీంతో ఆ కార్మికులు సిబిఐ అధికారులకు ఫిర్యాదు చేశారు.

విజయవాడ: ఎపి మంత్రివర్గ సమావేశం సిఎం చంద్రబాబు నాయుడు అధ్యక్షతన మంగళవారం ఇక్కడ ప్రారంభమైంది. ఆగస్టు 12 నుంచి జరిగే కృష్ణా పుష్కరాలపైనే ప్రధానంగా చర్చిస్తున్నట్లు సమాచారం. రాజధాని అమరావతి నిర్మాణం, మనం-వనం, ఎర్రచందనం వేలం, స్వాతంత్య్ర దినోత్సవ వేడుకలు, సాగునీటి ప్రాజెక్టులు తదితర అంశాలపై మంత్రివర్గ సహచరులతో సిఎం చర్చించే అవకాశం ఉంది.

ఢాకా: బంగ్లాదేశ్‌ రాజధాని ఢాకాలో సోమవారం అర్ధరాత్రి ఉగ్రవాదులను పోలీసులు సమర్థంగా తిప్పికొట్టారు. 10 మంది ఉగ్రవాదులు ఓ భవనంలోని నాలుగో అంతస్థులోకి చొరబడి దాడులకు పాల్పడేందుకు యత్నిస్తున్నట్లు సమాచారం రావడంతో పోలీసులు భవనాన్ని చుట్టుముట్టి కాల్పులు జరిపారు. తెల్లవారుజామున ఉగ్రవాదులకు పోలీసులకు మధ్య రెండు గంటల పాటు ఎదురుకాల్పులు జరిగాయి. ఈ కాల్పుల్లో 9 మంది ఉగ్రవాదులు హతమయ్యారు.

దిల్లీ: దేశ రక్షణ కోసం చివరి శ్వాస వరకూ పోరాడిన సైనికులకు శిరస్సు వంచి నమస్కరిస్తున్నానంటూ ప్రధానమంత్రి నరేంద్రమోదీ కార్గిల్‌ విజయ్‌ దివస్‌ను పురస్కరించుకుని అమరవీరులకు ట్విట్టర్‌ వేదికగా నివాళులర్పించారు. 1999 మేలో భారత్‌లో పాక్‌ సైనికులు చొరబడేందుకు ప్రయత్నించడంతో ఇరు దేశాల మధ్య కార్గిల్‌ యుద్ధం జరిగింది.