హైదరాబాద్: తెలంగాణలో ఆరు వర్సిటీలకు వైస్ చాన్సలర్లను నియమిస్తూ రాష్ట్ర ప్రభుత్వం సోమవారం ఆదేశాలు జారీ చేసింది. తెలుగు వర్సిటీకి డాక్టర్ ఎస్వీ సత్యనారాయణ, జెఎన్‌టియుకి వేణుగోపాలరెడ్డి, తెలంగాణ వర్సిటీకి సాంబశివరావు, కాకతీయ వర్సిటీకి సాయన్న, ఓయుకి రామచంద్రం, ఆర్‌జియుకెటికి సత్యనారాయణలను వీసీలుగా నియమిస్తూ ఉత్తర్వులు జారీ చేశారు.

జైపూర్: పోలీసులపైకి కాల్పులు జరుపుతూ ఖైదీలు జీపులో పారిపోతుండగా జరిగిన రోడ్డు ప్రమాదంలో ఎనిమిది మంది మరణించారు. మృతుల్లో అయిదుగురు ఖైదీలున్నారు. రాజస్థాన్‌లోని చురూ జిల్లాలో సోమవారం ఈ ఘటన జరిగింది. భూ వివాదానికి సంబంధించి పరారైన ఖైదీలు కోహినా గ్రామానికి చేరుకున్నారన్న సమాచారం అందడంతో పోలీసులు అక్కడికి చేరుకున్నారు. పోలీసులను చూసి ఖైదీలు కాల్పులు జరుపుతూ జీపులో పారిపోతుండగా మరో జీపు ఢీకొంది.

మహబూబ్‌నగర్: ప్రాజెక్టుల రీ-డిజైనింగ్ పేరుతో ప్రభుత్వ నిధులను తెరాస సర్కారు కాంట్రాక్టర్లకు దోచిపెడుతోందని, కమీషన్లు దండుకుని మంత్రులు అక్రమంగా సంపాదిస్తున్నారని బిజెపి నేత నాగం జనార్దనరెడ్డి సోమవారం ఆరోపించారు. అవినీతిని వెలికి తీసి ఆ మంత్రులను జైలుకు పంపుతానని ఆయన హెచ్చరించారు. అక్రమ సంపాదనపై తప్ప తెరాస మంత్రులకు అభివృద్ధి పథకాలపై ఆసక్తి లేదన్నారు.

అమృత్‌సర్ : పంజాబ్‌కు దూరంగా ఉండాలని బిజెపి నాయకత్వం తనకు చెప్పినందువల్లే రాజ్యసభ సభ్యత్వానికి రాజీనామా చేశానని నవ్‌జ్యోత్ సింగ్ సిద్ధూ సోమవారం మీడియాకు తెలిపారు. పంజాబ్ కంటే ఏ రాజకీయ పార్టీ తనకు ఎక్కువ కాదని, సొంత ఇంటిని కాదని తాను ఎక్కడికీ పోలేనన్నారు. సొంత రాష్ట్రం,సొంత ప్రజలే తనకు ముఖ్యమన్నారు. ఎంపి పదవికి రాజీనామా చేసిన సిద్ధూ బిజెపిని మాత్రం వీడలేదు.