లక్నో: కాపలా లేని రైల్వే క్రాసింగ్ వద్ద స్కూల్ వ్యాన్‌ను పాసింజరు రైలు ఢీకొనగా 8 మంది చిన్నారులు ప్రాణాలు కోల్పోయారు. యుపిలోని బడోహి జిల్లాలో సోమవారం ఉదయం ఈ దుర్ఘటన జరిగింది. ఓ ప్రైవేటు స్కూల్‌కు చెందిన వ్యాన్ 19 మంది విద్యార్థులతో వెళుతుండగా కాపలాలేని రైల్వే క్రాసింగ్ వద్ద వారణాసి-అలహాబాద్ పాసింజరు ఢీకొట్టింది. వ్యాన్ నుజ్జునుజ్జవడంతో 8 మంది పిల్లలు మృత్యువాత పడ్డారు.

నల్గొండ: రోడ్డుపై ఆడుకుంటున్న మూడేళ్ల బాలుడు బస్సుకింద పడి మృత్యువాత పడిన ఘటన తుర్కపల్లి మండలం నాగాయలంక తండాలో సోమవారం జరిగింది. గ్రామంలో విద్యార్థులతో బస్సు బయలుదేరగా రోడ్డుపై ఆడుకుంటున్న బాలుడు బస్సుకింద పడి అక్కడికక్కడే మరణించాడు. దీంతో గ్రామంలో విషాదఛాయలు అలముకున్నాయి.

హైదరాబాద్: కార్పొరేటు, ప్రైవేటు విద్యాసంస్థల్లో ఫీజులను నియంత్రించాలని, కెజి నుంచి పిజి వరకూ ఉచిత విద్య అందించాలని డిమాండ్ చేస్తూ ఎబివిపి ఆధ్వర్యంలో విద్యార్థులు సోమవారం నాడు కూకట్‌పల్లిలో ఆందోళనకు దిగారు. వారు రోడ్డుపై బైఠాయించడంతో ట్రాఫిక్ స్తంభించింది. పోలీసులు రంగంలోకి దిగి ఆందోళనకారులను అరెస్టు చేసి అక్కడి నుంచి తరలించారు.

విజయవాడ: మనం-వనం కార్యక్రమంలో భాగంగా ఈనెల 29న రాష్ట్ర వ్యాప్తంగా కోటి మొక్కలను నాటేందుకు సన్నాహాలు చేస్తున్నట్టు ఎపి సిఎం చంద్రబాబు తెలిపారు. ఆయన సోమవారం అధికారులు, ప్రజాప్రతినిధులతో టెలికాన్ఫరెన్స్ నిర్వహించారు. నాటిన ప్రతి మొక్కనూ పరిరక్షించుకునేలా ఆధునిక సాంకేతికను ఉపయోగిస్తామన్నారు. హరితాంధ్రప్రదేశ్‌ను సాకారం చేసేందుకు అధికారులు, ప్రజాప్రతినిధులు సమన్వయంతో పనిచేయాలన్నారు.