న్యూఢిల్లీ, జూలై 23: కాశ్మీర్‌లో నెలకొన్న పరిస్థితి పట్ల కాంగ్రెస్ పార్టీ శనివారం తీవ్ర ఆందోళన వ్యక్తం చేసింది. నిరసన కార్యక్రమాల్లో పాల్గొంటున్న ప్రజలపై పెల్లెట్ తుపాకులను ప్రయోగించవద్దని ప్రభుత్వాన్ని డిమాండ్ చేసింది. కాశ్మీర్ అంశంపై చర్చించినప్పుడు ప్రధానమంత్రి నరేంద్ర మోదీ ఇటు లోక్‌సభలో కాని, అటు రాజ్యసభలో కాని లేరని సీనియర్ కాంగ్రెస్ నాయకుడు గులాం నబీ ఆజాద్ శనివారం ఇక్కడ విమర్శించారు.

శ్రీనగర్, జూలై 23: ఉత్తర కాశ్మీర్‌లోని కుప్వారా జిల్లాలో నియంత్రణ రేఖ వద్ద ఉగ్రవాదుల చొరబాటును శనివారం ఆర్మీ భగ్నం చేసింది. ఈ సందర్భంగా ఉగ్రవాదులు జరిపిన కాల్పుల్లో ఒక సైనికుడు వీరమరణం పొందాడు. శుక్రవారం అర్ధరాత్రి పిఓకే నుంచి కొంతమంది భారత్‌లోకి చొరబడేందుకు యత్నించారు. పహరా కాస్తున్న భద్రతా బలగాలు అడ్డుకున్నాయి.

న్యూఢిల్లీ, జూలై 23: సుప్రసిద్ధ చిత్రకారుడు ఎస్‌హెచ్ రజా (94) శనివారం కన్నుమూశారు. ఆధునిక చిత్రకళకు చిరునామాగా నిలిచిన ఆయన దీర్ఘకాలంగా అనారోగ్యంతో ఉన్నారు. భారతీయ చిత్రకళా వైభవాన్ని ప్రపంచానికి అందించిన గొప్ప కళాకారుడాయన. బిందు, పురుష్-ప్రకృతి, నారీల ఇతివృత్తంతో రజా గీసిన చిత్రాలు ఎన్నో ప్రశంసలు అందుకున్నాయి.

ముంబయి, జూలై 23: దాదాపు మూడు దశాబ్దాలపాటు భారత్ దేశ రక్షణలో గురుతరమైన పాత్రను పోషించిన ‘గ్రాండ్ ఓల్డ్ లేడీ’ ఐఎన్‌ఎస్ విరాట్ తుది ప్రయాణాన్ని ముంబయి నుంచి కోచీకి శనివారం మొదలుపెట్టింది. ఈ ఏడాది చివర్లో నౌకాదళం నుంచి పూర్తిగా వైదొలుగుతున్న 750 అడుగుల ఈ మహానౌకకు ఇదే చివరి ప్రయాణం అవుతుంది. బుధవారం నాటికి ఈ నౌక కోచీ చేరుకోగలదని భావిస్తున్నారు.